КАЛАСЕ, "МАРИЙ ЭЛ"

Каласе, «Марий Эл»…: Кемым пӧртылташ лиеш

Поро жапда лийже, «Марий Эл» газет редакцийын пашаеҥже-влак. Пашада воранен толжо, калык чоныш шужо. Йӧн дене пайдаланен, тендан полшымо дене ик йодышем рашемдынем ыле. 

Февраль кыдалне ӱдыремлан теле кемым палынак волтымо (распродаже манме) ак дене нальым. Йӱштӧ игече пӧртылят, ӱдырем тудым ик арня гыч чийыш да икымше кечынак кӧргӧ отделкысе пунын утыжденат йогымыжлан вуйым шие. Мый тиде йолчиемым кевытыш кондышым да оксам пӧртылташ йодым. Но продавец йодмем шукташ тореш лие, тидым кемым палынак шулдештарен ужалыме пагытыште налме дене умылтарыш. Умылынем ыле, продавец чын ыштен мо?

И.Пахмутова.
Медведево район.

Йодышлан Роспотребнадзорын Марий Элысе виктемжын пресс-службыжым вуйлатыше Е.Желонкина тыге вашештыш:

– Россий Федерацийын потребительын праважым аралыме сферысе законодательствыже продавецлан палынак шулдештарыме ак дене ужалыме сатун качествыже шотышто обязательствым нимынярат луштарен огыл. Тидын дене келшышын, сатушто ситыдымашым мушо потребитель икмыняр йодмаш гыч иктыж дене пайдаланен кертеш:

* начар качестван сатум тыгаяк маркан сай качестван дене вашталташ;

* начар качестван сатум тыгаяк, но вес маркан сату дене вашталташ да тыгодым акын ойыртемжым шотлен лукташ;

* начар качестван сатун акшым эшеат волташ;

* начар качестван сатун ситыдымашыжым кевыт кӱшеш кораҥдаш але шке ачалыме годым пашан да кучылтмо материалын акыштым пӧртылташ йодаш;

* налме-ужалыме ойпидышым шӧраш да тӱлымӧ оксам пӧртылташ йодаш.

Тыгодым потребитель налме сатум продавецлан пӧртылтышаш.

М.ИВАНОВА.

Опубликовать в Одноклассники

Добавить комментарий