22-27 августышто Астраханьыште самырык-влаклан пӧлеклалтше Кечвалвел кундем федерал округысо «СЕЛИАС-2021» тунемме форум эртен. Тушко элнан 35 регионжо гыч 400 утла уста ӱдыр-рвезе ушнен. Марий Элын чапшым Кира Вишневская арален.
Мероприятий кум направлений почеш лийын. Тиде – «Ола кумдык», «Гражданский форум» да «Усталык форум».
«Мый форумын усталык направленийышкыже ушненам. Тушто куштышо, актёр, семӱзгарым шоктышо-влак погыненна. Кажне кечын кандаш шагат эр гыч пелйӱд марте мастер-класс, лекций, палыме еҥ-шамыч дене вашлиймаш лийыныт. Дью Солей циркын актёржо Андрей Кислицин ден Micos трион вуйлатышыже, клоун Сергей Давыдов дене мутланымаш шарнымашеш поснак кодын.
Профессионал-влак дене пашам ыштен ончымемлан моткоч куаненам. Участник-влак тӱрлӧ койышан лийме: кӧ чолгарак, кӧ вожылшырак… Туге гынат нуно кажныж дене вашкылым ыштен моштеныт. Лектыш семын куштымашым шындыме. Мурыжо лӱмынак форумлан келыштарыме лийын», – палдарыш Йошкар-Ола гыч ӱдыр.
О.МОШКИНА
