Марий Эл - 100

Кажне кечылан

Марий Элын 100 ияш лӱмгечыжлан С.Г.Чавайн лӱмеш калыкле лудмыверын пашаеҥже-влак шушаш ийлан «Ежедневник» брошюрым луктыныт.

Такшым тыгай брошюрым нуно кажне ийын савыктат, но тенийсыже палынак ойыртемалтеш. Тудо записной книжка семын веле огыл ышталтын, эшежым пайрем шӱлышан да уш-акылым пойдараш полшышо шуко увер дене темын. Тушто республикна дене кылдалтше тӱрлӧ историй событий, оҥай факт-влак улыт. Кече почеш кече ончыкталтын: кушто, кунам да мо лийын, кундемнам чапландарыше могай ойыртемалтше еҥ-влак иленыт, могай суапым ыштеныт. Кажне кече дене кылдалтше 2-3 событий дене палыме лийына. Сандене, брошюрым лудын, кундемна нерген шуко уым пален налаш лиеш.

Кажне лаштыкым фотосӱрет, марий шӱлышан орнамент дене сӧрастарыме. Тыгак савыктышыш республикысе ныл тӱҥ оласе эсктренный службо-влакын телефон номерыштым вераҥдыме. Тӱвыра, спорт, каныме учреждений ден организаций-влакынат телефон номерышт ончыкталтын. Тылзе, кече-влакым марлаш кусарен возымо. Икманаш, республикнан лӱмгечыжлан сай пӧлек лийын.

С.НОСОВА

Опубликовать в Одноклассники

Добавить комментарий