«12 май гыч пашам ыштыдыме пагыт пыта», — 11 майыште элнан субъектлажым вуйлатыше-влак дене эртарыме совещанийыште увертарен Россий президент Владимир Путин да тиде жап гыч чараклымаш мере-влакым луштараш тӱҥалме, но посна улмо режим гыч писынжак огыл лекме нерген палемден.
Президент субъект-шамычым вуйлатыше-влакын полномочийыштым умбакыже шуен. Тудо тыгак чараклымашым кораҥдыме шотышто пунчалым лукмаште пытартыш мут врач-влакын лиеш манын.
Совещанийыште Марий Элым вуйлатыше Александр Евстифееват участвоватлен.
Тӱшка мероприятий-влак кызытеш огыт эртаралт, организацийлаште посна санитарный режим шукталтеш, 65 ий деч кугурак да хронический черан-влаклан чараклыме мере-влак ончычсо семынак кодыт.
Пандемий тӱҥалме жап гыч 11 май йотке Марий Элыште у коронавирус инфекций дене черланыме 928 случайым официально регистрироватлыме. Ты чот гыч 254 еҥ черланымыжым нигузеат огеш шиж, 381 граждан инфекцийым куштылгын чыта, 237 пациентын тазалыкшым врач-влак «нелылыкын кокла йыжыҥже» семын аклат, 56 черлыным – «неле» семын.
COVID-19 дене черланен кертмым республикыштына кок лабораторийыште шымлат. Пандемий тӱҥалме жап гыч 11 май йотке чылаже 26594 шымлымашым эртарыме.
11 май кечылан 1099 еҥым, ты шотыштак 4 йот гражданым, медицине велым эскереныт. Ты учёт гыч 6650 еҥым кораҥденыт.
Коронавирусан пациент-влакым эмлашлан регионыштына кандаш медицине организацийыште 530 койкым шындыме, тидыже у норматив почеш темлыме деч 78 процентлан шукырак. Пытартыш 60 койкым – кумлым Йошкар-Оласе больницыште да эше кумлым Сар-влакын ветераныштын госпитальыштышт — Россий Минздравын пытартыш кӱштымашыж дене келшышын шындыме.
Совещанийыште Российын президентше йочан еш ден социальный да педагогический пашаеҥ-влаклан окса дене полшымо указым лукмыж дене палдарен:
* 1 июнь гыч 3 гыч 16 ияш марте кажне йочалан 10 тӱжем теҥге кугыт единовременный пособийым тӱлат.
* Апрель-июньышто 3 ияш марте кажне йочалан тылзыште 5000 теҥге дене тӱлат.
* Йочам ончымо шотышто пособийым кок пачаш кугемдыме да 6751 теҥге марте шуктымо.
* Ача-ава кокла гыч иктыже але коктынат пашам йомдареныт гын, апрель-июньышто нунын ийготыш шудымо кажне йочаштлан 3000 теҥге дене тӱлат.
* 3 гыч 7 ияш марте йочан ешыште ик еҥлан шотлымаште илен лекташ кӱлмӧ окса кугыт деч шагалрак лектеш гын, идалык тӱҥалтыш гыч 1 июль йотке еш кокла шот дене иканаште 33 тӱжем теҥгем налын кертеш.
* 15 апрель гыч 15 июль марте социальный пашаеҥ-шамычлан ешарен тӱлымӧ окса кугыт:
— социальный тӧнежлаште пашам ыштыше врач-влаклан кок арняш сменылан – 40000 теҥге дене;
— коронавирусан черле-влаклан полышым пуышо врач-шамычлан – 60000 теҥге дене;
— социальный да педагогический пашаеҥ-влаклан – 25000 теҥге дене.
* Социальный пашаеҥ-влаклан 15 апрель гыч 15 июль йотке ешарен тӱлымӧ окса кугыт:
— 35000 теҥге дене – COVID-19 дене черланыше-влак дене пашам ыштыше социальный ден педагогический пашаеҥ-шамычлан;
— 15000-20000 теҥге дене – изирак персоналлан;
— 10000-15000 теҥге дене – технический персоналлан.
Марий Элым вуйлатышын организаций да
аналитике виктемжын уверже негызеш М.ИВАНОВА ямдылен
