Элыштына да пӱтынь тӱня мучко коронавирус инфекций шарлымым шижтарышашлан шуко ышталтеш. Тидым шотыш налынак, 1 июльышто Россий Федерацийын Конституцийышкыже вашталтышым пуртымо шотышто йӱклымашат еҥ-влакын тазалыкыштлан лӱдыкшыдымын эртыже манын, чыла мерым ышташ ямдылалтыт.
Тидын нерген 4 июньышто лийше пресс-конференцийыште Марий Элын Рӱдӧ сайлымаш комиссийжын председательже Ирина Татаринова каласкалыш. Палдарымыж почеш, 1 июльышто йӱклаш толшо кажне еҥлан посна пакетым кучыктышаш улыт. Тушто маске, перчатке да ручка лийыт. Тидым чылаштлан яра пуат. Тыгак участкыш пурымаште кажне избирательын температуржым висат. Тудыжо кугурак лиеш гын, участкыш огыт пурто. Айдеме гражданский порысшым шуктен кертше манын, йӱклашыже йӧным ыштат, но лачшымак кузе тиде лиеш – эше рашемдат. Вес избиратель-влаклан лӱдыкшым ышташ огыл манын, очыни, нунылан посна пӧлемым ойырат. Икте-весын тазалыкшылан лӱдыкшым ышташ огыл манынак, тений кажне участкыште еҥ-влак ик омса гыч пураш да весе гыч лекташ тӱҥалыт.
Тыгак избирательный комиссий-влакын кажне членжылан коронавирус улмо-уке шотышто тестым ыштат.
Йӱклымаш эртыме участкылам дезинфицироватлыше раствор дене кече мучко обрабатыватлаш тӱҥалыт.
Йӱклаш йӧнан да лӱдыкшыдымӧ лийже манын, икмыняр у йӧнлан эҥерташ ямдылалтыт. Мутлан, еҥ-влак 1 июль деч ончычсо куд кече жапыште участкыш миен да йӱклен кертыт.
Тыгак игече сай лиеш гын, пӧлемыште огыл, а уремыште йӱклаш йӧн лиеш. Тидыже могай ялла ден илыме верлаште йӱклаш участке уке, тугайыште ышталтеш.
«Мӧҥгыштӧ бесконтактный йӱклымаш» йӧн денат пайдаланаш лиеш. Но тудыжо тӱрлӧ амаллан кӧра мӧҥгышт гыч лектын кертдыме избиратель-шамычлан гына пуалтеш.
Еҥ-влак «Мобильный избиратель» йӧнланат эҥертен кертыт. Но тидлан келшыше участкыште йӱклаш шонымо нерген тудын членже-влакым ончылгоч палдарыман да тушко прикрепитлаш йодмашым пуыман. Тидым МФЦ-ште, территориальный комиссийлаште да Госуслуго портал гоч ышташ лиеш.
Тыгак ты гана йӱклымӧ годым паспортым избиркомын еҥжылан кидышкыже пуыман огыл. Тудым ончыктымат сита. Но тыгодым тиде теак улыда манын палдарышашлан ик жаплан маскым кораҥдыман да чурийым ончыктыман.
Чыла тиде избирательный участкылаште еҥ-влак иканаште шукын ынышт погыно, черет ынже лий да еҥ-влакын тазалыкыштлан лӱдыкшым ышташ огыл манме шонымаш дене ышталтеш.
1 июльышто республикыштына йӱклымаш кузе кайымым палаш кӧн кумылжо лектеш гын, тидым ты кечын Марий Элын Рӱдӧ сайлымаш комиссийыштыже пашам ыштыше Увер рӱдерыште рашемдаш лиеш.
Любовь КАМАЛЕТДИНОВА
