Рӱдоласе депутат-влакын погынымашышт Йошкар-Олан Генеральный планышкыже вашталтышым пуртышашлан ямдылыме проект-влакым ончылгоч ончымо шотышто пашам умбакыже шуя. Мутлан, экономикым да ола озанлыкым вияҥдыме шотышто эреак ыштыше комиссий-влакын заседанийыштышт Генпланын проектышкыже вашталтыш семын Кугу Чигаш кундемысе мландым промышленный зоно гыч лукташ да шкалан пӧртым чоҥаш участке-влаклан ойыраш темлымашым шотлыман. Ты йодышым решатлаш пашаче группым ыштыме лиеш.
Ола озанлык управлений вуйлатыше Лев Покровскийын мутшо почеш, лишыл жапыште Анников уремыште йӱр вӱдым йоктарен колтышо канализацийым ыштыме, К.Маркс уремыште 114-ше №-ан пӧрт ваштареш уремым кумдаҥдыме, Л.Голиков ден К.Цеткин уремлам олмыктымо шотышто торгым эртарат. Депутат-влак чыла проектым сайлан шотленыт да 27 сентябрьысе сессийышкышт каҥашаш луктыт. Генплан шотышто тӱшка колыштмаш тений ноябрьыште Данилово ден Якимово яллаште, Семёновка селаште эртаралтыт.
А.Андреев
