Марий калыкын лӱмлӧ эргыже-влак, талантан композитор Яков Андреевич ден Андрей Яковлевич Эшпаймыт искусство тӱняште кумдан палыме улыт. Нунын возен кодымо музыкышт марий кундемыште веле огыл, уло Россий кумдыкышто йоҥгат.
23 апрельыште Йошкар-Олашке СССР Кугыжаныш да Ленинский премий-влакын лауреатше, СССР-ын калык артистше Андрей Яковлевичын эргыже кумдан палыме режиссёр Андрей Эшпай толын коштын. Тудын дене вашлиймаш Усталык ушем-влак пӧртыштӧ эртен.
— Кумдан чапланыше режиссёр Андрей Эшпайым ме таклан огыл ӱжынна. Вет 2020 ийыште Марий Эл Республикын 100 ияш лӱмгечыжым палемдаш тӱҥалына. Тидын вашеш кундемна нерген кином сниматлаш шонена. А тиде пашам Андрей Андреевичлан ӱшанена, — палемдыш тӱвыра, печать да калык-влакын пашашт шотышто министр Константин Иванов. — Шукерте огыл министерстве пелен пашаче группым чумыренна. Тусо еҥ-влак дене ме тылзе жапыште кином войзымо шотышто тӱрлӧ шонымаш, ыштышаш паша нерген каҥашаш тӱҥалына. Тыгодымак чыла мутланымашна нерген Андрей Эшпайым палдарена.
Уста композиторын эргыжын шочмо марий кундемже нерген фильмым ышташ кумылан улмыжо, мутат уке, мемнам, республикыште илыше кажне еҥым куандарыш.
— Марий мландыште улмым моткоч кугу пиаллан шотлем. Тышке ачамат кажне гана куанен коштын да толын кайымыжым поро шарнымаш семын аклен, — куанжым пайла Андрей Эшпай да ачажын лӱмеш савыкталтше книгам оҥ пеленже ӧндале. — Жапын-жапын тыште концертым эртарымыже ачамлан моткоч кӱлешан лийын. Вет тудо усталык пашалан, у произведенийым шочыкташ уло ӱнаржым пыштен.
Республикнан кугу лӱмгечыжлан пӧлеклалтше кино шотышто Андрей Эшпай икмыняр шонымашыже улмо нерген каласыш:
— У фильм моткоч оҥай, шонаш таратыше, чоным тарватыше лийшаш. Тудо республикыште илышым веле огыл, Россий калыкымат ончаш таратышаш.
А кызыт режиссёр 8 сериян кином войзымаште тырша. Тиде пашам июль-августышто мучашлышаш. Тиддеч посна А.Эшпай ВГИК-ыште самырык-влакым режиссёр мастарлыклан туныкта.
А.Байкова.
М.Скобелевын фотожо.
