Марий Элын туныктышыжо-влакым «Илыше классике» тӱнямбал педагогический форумыш ушнаш ӱжыт. Тений тудо 18-20 сентябрьыште лиеш, икымше гана онлайн йӧн дене эртаралтеш.
Форумын участникше-влаклан тӱрлӧ оҥай мероприятийлан поян программе вуча. Кум кечыште ик эн ончыл туныктышо да психолог-влакын лу утла лекцийыштым колышташ веле огыл, тыгак театрын да кинон актрисыже Юлия Меньшован мастер-классшым ончаш йӧн лиеш.
Журналист, радио- да телевӱдышӧ Фекла Толстая «Илыше лаштык-влак» проектше нерген каласкала, элын тӱҥ кинокритикше Антон Долин школысо программе гыч южо произведенийым вес шинчаончалтыш дене ончалаш полша, телевӱдышӧ Арина Шарапова паблик-ток йӧн дене йӧратыме книгаж-влак нерген ойлаш тӱҥалеш.
Форумыш ушнаш кумылан йодмашым тений 10 сентябрь марте пуэн шуктышаш. Тушто шинчымашым налмылан оксам тӱлыман огыл, тунеммашым эртыше кажне еҥлан сертификат пуалтеш.
Г.КОЖЕВНИКОВА
