Тачысе лаштыкнан унаже – Звенигово район Эсмекпляк ялын чолга ӱдыржӧ Наталья ВЕНИНА.
— Наталья, шукерте огыл «Вконтакте» соцсетьыш марий йылмым тунемме видеоурок-влакым вераҥденат. Ты проектым илышыш шыҥдараш шонымаш кузе шочын?
— Студент годсек ик верыште шинчен ом мошто. «ВийАр» ушемыште лийынам, МарГУ-м тунем пытарымеке, Марий тӱвыра рӱдерыште пашам ыштенам, вара Медведево районысо Краснооктябрьский школышто марий йылмым туныктенам. Соцсетьлаште еҥ-влакын марий йылмым тунемаш кумылан улмышт нерген шуко гана лудынам. Тыге марий йылмым скайп гоч туныкташ шонымаш шочын. Кызыт урок-шамычем «Вконтакте» соцсетын «Марийский язык с Натальей Вениной» группышто ончаш лиеш. Тунемше-влакемат вашке лектыныт. Америкыште илыше рушым, Михаил Гонодановым, Шотландийыште шочшо да Ирландийыште илыше кусаркалыше Дэвид Присым, немыч йылмым туныктышо Лариса Арламовам туныктенам. Вик ойлаш гын, ончыч лӱдынам. Кызыт тидым шарналтен шыргыжалам гына.
— Очыни, тиде сомыл шуко жапым налеш. Иктаж-кӧ тылат полша?
— Такшым чылажымат шке ыштем. Статьям, презентацийым ямдылаш, видеом войзаш, монтироватлаш жап кӱлеш. А тудо шагал. Туге гынат шукташ тыршем. А марий видеоурокым Интернетыш лукташ Сергей Иванов темлен. Икымше урокым сайын вашлийыныт. Калыкын кажне тау мутшо, полшаш ямде улмыжо мыйым умбакыжат пашам ышташ кумылаҥдат.
— Тора кундемыш илаш каяш мо таратен?
— Эре иктаж уым кычалме, вием тергыме шуын. Ухташте родо-тукымем ила. Нунын дене ик жап веле лийынам кызыт посна илем.
— Кызыт могай пашам шуктет?
— Англичан, руш йылме да литератур туныктышылан пашам ыштем, южгунам сӱаным але вес пайрем мероприятийым видеош войзем, жапын-жапын телевиденийыштат монтажерым алмашташ логалеш. Яра жапыште пидаш, сӱретлаш, книгам лудаш йӧратем.
— Марий йылмына умбакыжат илыже манын, мом ыштыман?
— Ешыште марла кутырат гын, икшыве шочмо ылмыж денак мутлана. Но тыгаят вашлиялтеш, кунам ача-ава икшыве дене марла кутыра, а тудо рушла гына вашешта. Мыйын шонымаште, амалже — телевизор, тушто чыла гаяк передачыже рушла. Йылмына ынже йом манын, тудым утларак кучылтман, у технологийлан эҥертыман. Марий каналым «Россия» канал кӧргыштӧ огыл, а посна ыштыман манын шонем. Умылем, тиде кугу шийвундым йодеш. Но йылмына ончыкыжымат вияҥже да аралалт кодшо манын, у саманын йогынжо деч почеш кодман огыл.
Лидия ШАБДАРОВА мутланен.
