Марий Эл Республикын Финанс министерствыже 2018-2020 ийлан дефицитдыме республиканский бюджетым палемден. Келшен толшо документым правительствын заседанийыштыже сайлан шотленыт. Заседанийым правительстве председательын икымше алмаштышыже Сергей Сметанин эртарен.
Марий Элын консолидироватлыме бюджетшын кугытшо доход ден роскот шот дене вес ийлан 26,8 млрд теҥге, 2019 ийлан – 25,5 млрд, 2020 ийлан – 25,4 млрд теҥге палемдалтеш.
— Бюджетын роскот ужашыже Россий президент Владимир Путинын «майысе» указше-влак дене келшышын, посна категорий пашаеҥ-влакын пашадарыштым кугемдыме шот дене ышталтын. Тыге 2018 ий 1 январь гыч бюджет сферыште тыршыше-влакын пашадарыштым 4 процентлан индексироватлат. Тулык икшыве-влакым ашнаш тӱлымӧ окса кугытым 1,8 пачаш кугемдаш, шуко шочшан еш гыч икшыве-влаклан кочкашышт ойыралтше окса кугытым 2 пачаш ешараш, тунемше-влаклан учебникым яра пуаш оксам 3,3 пачаш шукырак ойыраш лийме. Бюджет учреждений-влакын коммунальный услугыштлан тӱлышаш роскот 1,4 пачаш кугемшашым шотыш налын палемдалтеш, — ойлен республикын финанс министрын пашажым шуктышо Алексей Торощин.
Тиддеч посна 2018 ийлан республикын бюджетышкыже школ автобус-влаклан топливым налаш, туныктышо-влаклан медосмотрым эртараш, кыл услугылан тӱлаш, йоча-влакын тазалыкыштым пеҥгыдемдаш да нунын канышыштлан роскот кугыт пурталтын. Тыгодымак, капитально олмыкташ, инвестиций сынан мероприятий-влаклан да бюджет парымым обслуживатлаш роскотым иземдыме. Пытартышыж кӱшеш гына 600 млн теҥге наре аныклалтшаш.
Кумданрак — «Марий Эл» газетын
2017 ий 4 ноябрьыште лекше номерыштыже лудын кертыда.
Л.Камалетдинова.
