Келшымаш пӧртын чырык ужашыжым нолтенат шуктеныт.
Марий Элысе калык-влакын Келшымаш пӧртышт Федеральный адресный инвестиций программын программысе огыл ужашыжын кышкарыштыже чоҥалтеш. Пашам тений мартыште тӱҥалыныт гын, план почеш тудым 2023 ий майыште мучашлышаш улыт.
Тачысе кечылан мом ыштен шуктымо нерген тӱвыра, савыктыш да калык паша шотышто министр Константин Иванов регион вуйлатыше Александр Евстифеевым паша вашлиймаш годым палдарен.
«Подрядчик сайын пашам шукта, графикымат ончылта. Эн нелыже –пӧртын кӧргыжым шонен ыштыман, вет тудо мемнан национальный республиклан пеш специфический нелытым нумалше объект лийшаш. Сандене пӧрт кӧргым тӱзатыме да интерьерым ыштыме, технически пойдарыме шотышто министерстве ончылгоч шонышаш», – вашлиймашым тӱҥалшыла каласен А.Евстифеев.
«Кызыт лачшымак пӧлем-влакын дизайн-проектыштым да объектым пойдараш оборудований переченьым ямдылена. Тендан шындыме тӱҥ задаче – объект шуко фунциян лийшаш, сандене икымше пачаш гычак тӱҥалын, тудын тӱсшӧ кумылым савырышаш. Кокмышо пачаш – тиде тоштер кумдык. Кумшо пачашыште 300 еҥлан шуко функциян тӱҥ зал лиеш. Эртарыме мероприятийым шотыш налын, тудо тӱрлӧ семын пайдаланаш йӧршӧ лийшаш. Туштак кусарыше-влаклан да молылаланат полем-влак лийыт» – эскиз-влакым ончыктышыла палдарен Константин Иванов.
Марий Эл вуйлатышын ойлымыж почеш, республикын кучем органже-влаклан пашам ышташ торжественный заседаний зал уке, сандене тыгай пӧрт моткоч кӱлеш. Дизайн-проект тудлан келшен. Но регион вуйлатыше палемден: чылажат специалист-влакын экспертизышт гоч эртышаш, шкенанат позицийна чоткыдо лийшаш, тунам дизайн-проект гыч объектым чоҥымо вес этапыш куснаш лиеш.
Ончыктен кодыман, Келшымаш пӧртым чоҥаш Россий Правительстве федеральный субсидийым ойырен. Александр Евстифеев ты шотышто йодышым элнан премьер-министрже Михаил Мишустин, Россий Президентын Юл кундемыште Полномочный представительже Игорь Комаров дене вашлиймаште каҥашен. Кодшо ийын Правительстве Председатель тидлан 700 миллион теҥгем ойыраш кӱштен.
Ты кечынак регион вуйлатыше объектыште паша кузе кайыме дене палыме лийын. «Казанский посад» ООО-н – подрядчикын – директоржо Руслан Муталиевын ойлымыж почеш, тачысе кечылан 100 процентлан гидроизоляцийым да подвал пырдыжым шокшемдыме пашам шуктымо. Икымше пачашат тӱрыс ямде. Кызыт кокымшо пачашым нӧлташ пижме. Объектыште кок кран, 35 ен пашам ыштат. Объектым чоҥымо пашам палемдыме график почеш шуктен толаш кӱлмым регион вуйлатыше эше ик гана палемден.
Марий Эл вуйлатышын организаций да аналитике виктемыжын уверже негызеш С.Носова ямдылен.
