Эртыше кечылаште Йошкар-Оласе «Марий Эл» ий полатыште Спорт министерстве Физкультурныикын кечыже лӱмеш пайрем шотан коллегийым эртарен. Ты кечын спорт мастер нормативым шуктышо-влаклан документым кучыктышт да тӱрлӧ ийготан икмыняр спортсменым ГТО-н шӧртньӧ знакше дене палемдышт. Тыгак Йошкар-Ола, Волжск, Медведево, Шернур, Волжский да моло район гыч икмыняр тренер, спорт школлаште, учреждений ден сооруженийлаште тыршыше-влаклан, нунын пашаштым кӱкшын аклен, Тауштымашан дипломым кучыктеныт. Нунын коклаште марий спортын легендышкыже савырныше Леонид Глушков, Станислав Демкович, Валерий Матвеев, Владимир Гаврилов лийыныт.
Погынымаште спорт министрын пашажым жаплан шуктышо Иван Гребнев шкешотан иктешлымашым ыштыш.
– Физический культур да спорт дене еҥ-влакын таҥлалтмышт шотышто Марий Эл Российыште ик эн ончылно кая. 2016 ийыште иктешлыме почеш, «Физический культур да тӱшка спорт» направлений дене всероссийский смотр-конкурсышто чыла регион коклаште шымше верыш лектын. «Йоча спорт» направлений дене 85 регион коклаште – 30-шо, а материально-технический базым вияҥдыме шотышто – 13-шо верыште, – пеҥгыдемдыш тудо.
Такшым спорт отрасль вияҥме шотышто Марий Эл Российыште 50-ше верым налеш, а ик миллион наре еҥ илыман кундем коклаште – 11-ше. Тидыже профессионал, тыглай еҥ-влаклан спорт дене кылым кучаш сай условийым ыштыме, материально-технический базым кумдаҥдыме дене кылдалтын.
Тидымат палемден кодыман: коллегийын заседанийыштыже И.Гребнев республикыште спортын могай видше икымше лийшашым палемдыш. «Спортын чыла видше сайын вияҥшаш, но тӱнямбалнат, элыштынат, Марий Элыштат 1-ше номеран – футбол. Сандене кӧ кертеш, тудын дене кӧ кылдалтын, командылан, клублан, федерацийлан полшышт манын шонем. Тидыже мемнан тӱҥ пашана», – мане тудо «Марий Эл» футбол командын, футбол дене спорт школын директоржо А.Ненашкиным саламлымыж годым.
Е.Эшкинина.
