1 июль – РФ Конституцийыш вашталтышым пуртымо шотышто всероссийский йӱклымаш кече.
Но коронавирус черлан кӧра еҥ-влакын тазалыкыштлан лӱдыкшӧ ынже лий манын, 25 гыч 30 июнь марте ончылгоч йӱклаш лиеш. Тиде амал денак теҥгече Марий Эл ЦИК председательын алмаштышыже Вениамин Осокин йӱклымаш тӱҥалме шотышто интервьюм пуыш. Тудо ты йӱклымашын ойыртемже-влак нерген ушештарен кодыш. Мутлан, еҥ-влак посна келыштарыме пӧлемыште веле огыл йӱклен кертыт. Тыгак эше 25 гыч 30 июнь марте участковый комиссий-влак могай илемыште йӱклаш пӧлем уке, тушко, тыгак пӧрт воктенысе кумдыклашке миен, йӱклымашым эртарат. Иканаште шуко еҥ йӱклаш толеш гын, нунылан ик омса гыч пураш да весе гыч лекташ йӧн ышталтын.
Мутлан, теҥгече интервьюм пуымо участкыште, Йошкар-Оласе 11-ше номеран лицейыште, икымше кечынак тунар шукын йӱклаш толыныт ыле – товатат, ондак Мавзолейыш пураш черетым ушештарыш. Туге гынат, шке шинча денак ужна: ты йӱклымашын ойыртемже да Роспотребнадзорын йодмашыж дене келшышын, кажне толшын температурыжым висат, чылаштын кидыштым санитайзер дене обработатлат да маскым, перчаткым, ручкам пуат.
Йӱклаш кажне кечын 8 шагат эр гыч 20 шагат кас марте мияш лиеш.
Любовь КАМАЛЕТДИНОВА
Авторын фотожо
