СПОРТ

Икымшат, кокымшат…

6-7 октябрьыште Саранскыште ечызе-куржталше-влак коклаште кеҥеж двоеборье дене всероссийский таҥасымаште Марий Эл гыч команде вийжым терген да сай результатым ончыктен.

Икымше кечын кроссышто (6 км.) Параньга гыч Стас Егоров икымше верым, Медведево район гыч ечызе Дмитрий Чекулаев кокымшым, эше ик землякна Провой кундемын эргыже Николай Васильев нылымше верым налыныт. Тыгак юниор-влак коклаште (4 км.) Медведево район гыч Кирилл Рыбаков визымше, Звенигово районын тале спортсменже Артём Лунник шымше вер дене палемдалтыныт. Рвезе-влак коклаште Владислав Балуев (Мордва гыч, Йошкар-Оласе радиомеханический техникумышто тунемеш), Алексей Сапаров (Советский), Андрей Шестаков (Кужэҥер) эн тале лу ечызе коклашке логалыныт.

Эрлашыжым ече-роллер дене (эрыкан йӧн) таҥасымаште 16 километрыште Д.Чекулаев кокымшо, С.Егоров нылымше, Н.Васильев  кудымшо лийыныт. Рвезе-влаклан тӱнямбал чемпионатын шым гана сеҥышыж дене стартыш лекташ логалын. Тидыже нунылан могай-гынат опытым пуэн, мастарлыкым ешарен. Шке тӱшкаштышт К.Рыбаков ден А.Лунник визымше ден кудымшо верыш лектыныт. Тыгай кӱкшытан стартыште тидыже путырак сай кӱкшыт.

Ӱдыр-влак коклаште эн сай результатым Ирина Соловьёва (Курыкмарий) ончыктен. Тудо ныл километр кужытышто кроссыштат, ече-роллер дене куржталмаштат ший призёр лийын.

Тыге ечызе-влак тургымым почаш ямдылалтыт.

Е.Эшкинина.

Опубликовать в Одноклассники

Добавить комментарий