УВЕР ЙОГЫН

Икте курчак пӧртым пӧлекла, весе- колонкым…

10 декабрьыште Марий Элын Кугыжаныш Погынжо ден Социальный вияҥмаш министерствыже «Кумыл кож» поро кумыл акцийым эртареныт.
Конгресс полат заседаний зал ончылнысо холлыш шогалтыме у ий кожышто модыш дене пырля «Солнышко» йоча пӧртыштӧ да ийготыш шудымо-влаклан палемдалтше Волжск оласе социально-реабилитационный рӱдерыште илыше тулык да ача-ава ончымо деч посна кодшо ӱдыр-рвезе-шамычын Йӱштӧ Кугызалан возымо серыштышт кечен. Кож воктеке вераҥдыме монитор социальный тӧнежлаште воспитатлалтше йоча-влакын У ий пайремлан могай пӧлекым вучымышт нерген каласкалымыштым ончыктен.
Икшыве-шамычын шонымашыштым шукташ марий парламентын депутатше-влак кокла гыч ятырынже кумылаҥыныт. Мутлан, Наталья Пушкиналан ийготыш шудымо-влаклан палемдалтше Волжск оласе социально-реабилитационный рӱдер гыч кандаш ияш ӱдырын серышыже логалын. Икшыве Йӱштӧ кугыза деч курчак пӧртым вуча, да «Лумӱдыр» тудын кумылжым шукта. Вес депутат Максим Бронников «Солнышко» йоча пӧртыш 14 ияш рвезылан колонкым наҥгая.
Акцийыш Кугыжаныш Погынын латнылымше сессийышкыже ӱжмӧ пагалыме еҥ-влакат: Россий Федерацийын сенаторжо, Марий Эл Кугыжаныш Погын деч представитель С.Мартынов, республикыштына айдемын праваже шотышто уполномоченный Ф.Мухаметгалиев, «Марий Эл профушем организаций-влакын объединенийышт» ушемын председательже О.Цветкова, — кумылын ушненыт.
«Кумыл кож» — сай акций, тудо илышыште шагал огыл нелылыкым ужшо ятыр йоча ден илалше еҥын шонымашыштым шукта, ончыкылыклан ӱшаным пуа, весын ойгыжым умылаш, поро лияш туныкта.

М.ИВАНОВА

Опубликовать в Одноклассники

Добавить комментарий