УВЕР ЙОГЫН

Икте гыч весыш кузе куснаш?

Республикыштына 390 тӱжем утла еҥ пенсийыш лекме жаплан оксам пога. Тиде средстве Россий Пенсий фондын але кугыжаныш огыл пенсий фонд-влакын лицевой счётлаштышт палемдалтеш. Но мемнан кокла гыч пеш шагалынже тудын пӱрымашыжым эскерена. Практике ончыктен: страховатлалтше шуко еҥ пенсийлан погымо средстважым виктарыме шотышто ойпидышым кунам да могай фонд дене ыштымыжым ош шарне.  

Страховщикым кугыжаныш услуго порталысе индивидуальный лицевой счёт полшымо дене рашемдаш лиеш. Тидым Россий Пенсий фондын сайтыштыже личный кабинет, фондын мобильный приложенийже але клиент службыжо-шамыч гоч ышташ йӧн уло.

 Граждан-влак сулен налме канышыш лекме жаплан погымо оксаштым виктарыше кугыжаныш але кугыжаныш огыл пенсий фондым шке ойырен налаш праван улыт.

2015 ий гыч фондым куснымо але жап деч ончыч куснымо нерген йодмашым пуэн вашталташ лиеш. Икымше случайыште пенсийлан погымо окса у фондыш йодмашым пуымо деч вар 5 ий гыч кусаралтеш, кокымшо случайыште – йодмашым пуымо деч вара вес ийынак.

Мут толмашеш, жап деч ончыч кусарыме нерген йодмашын ойыртемже кусарыме жап дене веле огыл, тыгак палемдыме фондлан кусараш кӱлмӧ суммым шотлен лукмо денат чак кылдалтын. 5 ий гыч куснымо годым пенсийлан тымарте погымо окса у фондыш тичмашнек, инвестиций доходге, кусаралтеш. А жап деч ончыч куснымо годым инвестиций доходым йомдарыме лӱдыкшӧ уло.

 Средствам инвестироватлыме годым граждан-влакын интересыштым аралаш манын, тений ик пенсий фонд гыч весыш куснымо порядкыш вашталтышым пуртымо:

— ынде кызытсе гыч вес пенсий фондыш куснымо нерген йодмашым Россий Пенсий фондын верысе клиент службыштыжо але кугыжаныш услуго порталыште вияҥдыме квалифицироватлыме электрон кидпале дене пеҥгыдемдыме электрон документ формо дене гына пуаш лиеш;

—  2019 ий гыч куснымо нерген йодмашым 1 декабрь деч вара пуаш чарыме (тымарте 31 декабрь йотке налме);

— граждан-влаклан жап деч ончыч куснымо йӧнын уто-ситыж дене палдарыме обязательный процедурым пуртымо. Инвестиций доходым йомдарен кертме нерген Россий Пенсий фондын верысе органыштыже але кугыжаныш услуго единый порталыште йодмашым пуымо годым пален налаш йӧн уло;

— 31 декабрь марте «йӱкшыктарыме жап» пашам ышта. Тыгодым граждан-влак ойырен налме у пенсий фондыш куснымо деч шӧрлен да ончычсыштыштак кодын кертыт. Тидланже страховщикым вашталтыме шотышто шӧрлымӧ нерген уверым гына пуаш кӱлеш.  

Ушештарена: ик пенсий фонд гыч весыш куснымо йӧн – гражданинын праваже, а обязанностьшо огыл. Страховщикым айдеме шке ойырен налеш, а пашам пуышо, пашаш налше агентстве але кредитым пуышо коммерческий банк мойн огыл. 

М.ИВАНОВА

Опубликовать в Одноклассники

Добавить комментарий