Йошкар-Олаште Водопроводный – Красноармейский уремла кундемысе Какшан серым шушаш ий ноябрь марте пеҥгыдемден шуктышаш улыт.
Кызыт тиде объектыште икымше йыжыҥым мучашлыме: 304 м кужыт кумдыкышто вертикальный планировко, кӱшыл ден ӱлыл ростверкым келыштарыме, дамбым пеҥгыдемдыме пашам шуктымо, 280 утла свайым кырыме. Чыла тидлан подрядчик 49,5 млн. теҥгем кучылтын. Ты суммо гыч 7 млн. теҥгежым республик ойырен. Кокымшо йыжыҥлан 50 млн. утларак теҥгем кучылташ палемдыме.
Дамбын ик эн тӱҥ задачыже – Красноармейский слободасе суртлам, «Динамо» стадионым, йӱшаш вӱдым тулымо станцийым аралаш.
Инженер сооружений-влакым ончен коштмо годым Марий Эл Республикым вуйлатыше Александр Евстифеев тиде объектым кӱлешанлан шотлышо еҥ-влак дене вашлийын. Мутлан, «морж-шамыч» дамбым чоҥаш тӱҥалме деч вара Изи Какшаныш «Динамо» стадион вел гыч логалаш нелырак лиймылан кӧра йӱштылмӧ верым кусараш йодыныт. Регионым вуйлатыше таза илыш-йӱлам шке пример дене пропагандироватлыше-влаклан у площадкым ойыраш кӱштен.
А.Евстифеев дамбым чоҥымо икымше йыжыҥын подряд организацийжылан икмыняр замечанийымат ыштен. Мутлан, сооруженийын негызше воктенсе мланде чоҥгам шот дене пеҥгыдемдыме огыл.
«Ме тидым чытен огына керт, сандене тендам витараш тӱҥалына. Те тидым кызыт петыреда лийже, а вара мо? Шушаш шыжым, шушаш шошым эшеат виян сирла. Кызыт тидым пеҥгыдемден огыда керт, свай дене кучыкташ кӱлеш ыле. Профессионал улыда, сандене чоҥгам пеҥгыдемдаш кӱлмым, тудын сирлымыжым шудын кучен сеҥыдымыжым умылышаш улыда ыле. Тиде тайылым газонат кучен огеш керт. Замечанийым тӧрлатыза, те тудын деч нигушкат огыда шыл», – манын республикым вуйлатыше.
А.Евстифеев тыгак «Динамо» стадионын ончыкылык реконструкцийжын у дамбе дене кылдалтше йодышыжо-влакым лончылаш кӱштен.
Изи Какшаным ончымо годым республикым вуйлатыше Национальный президент искусство школ воктенысе кумдыкын купыш савырнымыжым да куакшеммыжым палемден, регионысо Минстройлан шинчыше вӱдым йогыныш шӱкал лукмо йодышым лончылаш кӱштен.
Шинчыше вӱд олмыш фонтаным келыштараш але пундашышкыже насос группым шындаш темлыме. Пример шотеш А.Евстифеев Чебоксарысе эҥер серым конден: мотор фонтан олам сӧрастарымыж деч посна эше вӱдым уэмда.
Марий Эл Республикын организаций да аналитике виктемжын уверже негызеш М.ИВАНОВА ямдылен.
