УВЕР ЙОГЫН

Идалыкат пеле гыч – палашат огеш лий

31 январьыште Марий Эл вуйлатыше паша дене Оршанкыште лийын да капитально олмыктымо деч вара тушто уэмдыме Физкультур да спорт рӱдерым почын.

Тиде – Оршанкысе йоча-юношеский спорт школын пашажым шуйышо учреждений. Школ 30 ий ончычак пашам ышташ тӱҥалын, но шкенжын залже лийын огылат, тудым але марте тунемме учрежденийлаште айлен.

— Тиде районлан гына огыл, а пӱтынь республиклан пайрем. Молан манаш гын калыкым физкультур да спорт дене кылым кучаш кумылаҥдымаш – кучем орган-влакын шуктышаш задачышт. Мемнан шонымашна шуко. Спорт инфрастурктур тендан районышто веле огыл, республикын моло илемыштыжат вияҥеш, — каласен Александр Евстифеев.

Ты рӱдерыш Марий Эл вуйлатыше кокымшо гана толын каен. Икымше гана идалыкат пеле ончыч тыште лиймыж годым, шарнем, тудо верысе калыкын неле ты социальный йодышыжым личный конрольышкыжо налме нерген каласыш да спорт дене кылым кучаш чыла условийым ышташ кӱштыш.

— Ачалыме пашам шот дене шуктымо. Ты шотышто нимогай ӧпке мут уке, — палемден кызыт лиймыж годым Александр Евстифеев.

Тыште ыштыме тӱрыс пашан акше 9,5 млн. теҥгешке шуын. Тиде окса Марий Эл Республикын правительствыжын резерв фондшо гыч ойыралтын. Шийвундо оралтым олмыкташ веле огыл ситен, тыгак тудын дене ӱмаште декабрьыште кӱлеш чыла спорт инвентарьым налыныт, пожар сигнализаций системым вераҥденыт.

Оршанке муниципал район администраций вуйлатыше полышым пуымылан республик вуйлатышылан тауштен да ӱдыр-рвезе-влакын шонымашышт шукталтмым палемден. Ынде кеч-могай кӱкшытан таҥасымашым эртарашат намыс огыл манын каласен.

Кызыт тиде рӱдерыште 18 спорт да тазаҥдарыше группылаште 260 еҥ футбол, баскетбол, дзюдо, спорт туризм дене заниматла. А уэмдыме полатыште кок пачаш наре, 500 марте, еҥ капкылжым да тазалыкшым шуарен кертеш. Тидын дене пырля фитнес, аэробике, ӱстембал теннис да хоккей дене тренер-преподаватель-влакын чотыштым ешарат. Тыгак ынде тыште Оршанке школышто тунемше-влаклан физкультур урок-влак эртаралташ тӱҥалыт. Уке гын але марте спортзалыште иканаште кок, южгунамже кум классат пырля заниматленыт.

Волгыдо кумда спортзаллан да у татамилан таушташ пытартышлан Марий Эл вуйлатыше деке дзюдо секцийыш коштшо рвезе лишемын да Александр Евстифеев дене кидым кучен. Тыгодым чыла тренировкыш кошташ, таҥасымашлаште сеҥаш товатлен. Вашешыже республик вуйлатыше таҥасымашлаште сай результатым ончыктымыштлан йоча-шамычлан тауштен да у кӱкшытыш шуаш тыланен, палдара Марий Эл Республик вуйлатышын организаций да аналитике виктемже.

Л.Камалетдинова.

Опубликовать в Одноклассники

Добавить комментарий