Санкт-Петербургысо да Ленинград областысе марий-влакын «Ший корно» калыкле-тӱвыра мер автономийышт (вуйлатышыже – Е.Соловьева) Сеҥымашын 75 ияш лӱмгечыжлан сай пӧлекым ямдыленыт — «Мы вместе защищали Ленинград» шарнымаш книгам савыктен луктыныт.
Тудо Марий кундемыште шочын-кушшо да Кугу Отечественный сар жапыште Ленинград мландыште вуйым пыштыше салтак-влак нерген палдара. Тушко Ленинградым аралымаште кредалше да сусырген колышо, увер деч посна йомшо 4469 еҥын лӱмжым пуртымо. Книга автор- составительже – Г.Белашова, редакторжо – В.Соколов. Нуно коктынат Ленинград кундемысе Марий Эл землячествын чогла еҥже улыт. Галина Васильевна мер илышыште землякна-влакым шарныме дене кылдалтше пашам вӱда. А медицине службын подполковникше Василий Васильевичым ме землячествым чумырышо, тудым ятыр ий вуйлатыше семын палена.
У савыктыш дене икымше гана ты организацийын Сеҥымаш кечылан 75 ий да Марий автономийым ыштымылан 100 ий теммылан ямдылыме посна ончерыштыже палыме лияш йӧн ышталтын. Тушто блокадыш логалше Ленинградлан марий салтак-влакын да Марий АССР-ын могай полышым пуымышт нерген палдареныт.
Книгам савыктен лукташ шийвундо дене Ленинград областьысе Печать комитет полшен. Областьын бюджетше гыч социально кӱлешан литературым савыктен лукмо амал дене субсидий ойыралтын. У книга дене палдарыме мероприятий карантин пагыт эртымеке лийшаш.
С.НОСОВА
