Звенигово оласе 1-ше номеран школлан тений 140 темын. Тидын лӱмеш кодшо кечылаште районысо тӱвыра да каныме «Мечта» рӱдерыште кугу пайрем мероприятий эртен.
Историйым шергалаш гын, 1878 ийыште тунамсе Звенигово посёлкышто «Дружина» пароход обществын оксаже кӱшеш смешанный манме калык училищым почыныт. Чебоксар уездыште тиде икымше частный училище лийын. 1902 ийыште тудым земский школыш савыреныт. А 1918 ийыште икымше степенян школ лийын. Тушто 4-ше класс марте туныктеныт. 8 ий гыч тудым Фабрично-заводской семилеткыш савыреныт. 1930 ий гыч кыдалаш школ семын пашам ышташ тӱҥалын.
Кызыт Звениговысо 1-ше номеран школышто 455 тунемшылан 29 педагог шинчымашым пуа.
Л.Камалетдинова.
