УВЕР ЙОГЫН

Жаплан паша гыч кораҥдыме

Марий Элым вуйлатышын пашажым жаплан шуктышо А.Евстифеев Морко районын депутатше-влакын погынымашыштлан «Морко муниципальный район» МО-н администрацийжым вуйлатыше С.Григорьевын корнышто пассажирым  наҥгайыше автобус кумыкталтмылан кӧра нимом ыштыдымыже шотышто тергымашым эртараш кӱштен.

Ушештарена: 16 июльышто Морко районышто кугу ДТП лийме нерген газетна увертарен ыле. Морко-Роҥго-Ургакш корнын 34-ше меҥгыштыже ПАЗ-ын водительже ончылгоч рашемдыме почеш рульым виктарышыжлак нералтен колтен, тидлан кӧра Советский поселкысо «Акашевский» сурткайык фабрикын пашаеҥже-влакым наҥгайыше  автобус корно ӧрдыжкӧ каен да йӧрлын.

Салонышто 29 еҥ лийын. Азапыш логалше чыла еҥлан медицине полышым пуаш логалын, кокытшым эмлымверыш пыштыме. Колышо уке. Пытартыш увер почеш, куд пассажир чотыракак сусырген, кидышт-йолышт тугалтын, кызыт нуно эмлалтыт. Молышт куштылгын эмганеныт.

Шуко еҥ логалман азапыште С.Григорьев республикысе правительствын пеҥгыдемдыме, тыгай годым мом ышташ кӱлмӧ шотышто регламентым пудыртен, кӱшнырак шогышо должностян еҥ-влаклан шуко еҥан туткар лийме нерген увертарен огыл, тыгак район вуйлатыше-шамычым аварий верыш жапым шуйкалыде лекташ мерым ыштен огыл.

А.Евстифеевын темлымыж почеш да районысо депутат-влакын погынымашыштын решенийже дене келшышын служебный тергымашым эртарыме жаплан С.Григорьевым шке пашажым шуктымо деч кораҥдыме. Ты тергымашыже общий правил почеш муниципальный служащий-влак шотышто 30 календарный кечыште эртаралтеш.

А.АНДРЕЕВ.

Опубликовать в Одноклассники

Добавить комментарий