Ик еҥ весе нерген шоям ойлен коштмыжлан мут кучаш шогалташ лиеш манын колынам. Рашемдынем ыле, тыгай шоячым мо вуча?
М.Петрова
Руэм поселко.
Йодышлан Медведево районысо прокурорын кугурак полышкалышыже Л.Давлетшина вашештен:
— РФ Уголовный кодекс почеш тидлан мут кучаш логалеш. Уголовный кодексын 128-ше статьяж дене келшышын, вес лицан чапше ден достоинствыжым шӱктарен але тудын репутацийжылан эҥгекым ыштыше, ончылгоч шоя сведений улмым пален, тудым шаркалымылан 500 тӱжем теҥге марте але судитлыме еҥын куд тылзыште налме пашадарже але моло доходшо кугыт штрафым тӱлаш палемден кертыт, але 160 шагат наре пашам ыштыктат.
Тӱшка калык ончылно выступатлыме, тӱшка калыклан ончыктымо произведенийлаште але СМИ-лаште палдырныше шоялан ик миллион теҥге марте, але судитлыме еҥын ик ий марте налме пашадарже але моло доходшо кугыт штрафым тӱлаш пуэн кертыт, але 240 шагат марте сроклан пашам ыштыктат.
Служебный положений дене пайдаланыше еҥ вес еҥ нерген шоям ойла гын, тудлан 2 миллион теҥге марте штрафым але судитлыме еҥын кок ий марте жапыште налме пашадарже, але моло доходшо кугыт штрафым тӱлаш пуат, але 320 шагат марте пашам ыштыктат.
Кунам айдемын вес еҥлан лӱдыкшым ыштен кертме нерген шоям шаркалат гын, тыгак тудым виешлымаште титаклыме дене кылдалтше шоялан, штрафын кугытшым 3 миллион теҥге, але судитлыме еҥын кум ий марте жапыште налме пашадарже, але моло доходшо кугыт наре палемден кертыт, але 400 шагат марте пашам ыштыктат.
Вес еҥын неле але поснак неле преступленийым ыштымыжлан титаклыме дене кылдалтше шоялан 5 миллион марте теҥге, але судитлыме еҥын кум ий марте налме жапыште пашадар кугыт штрафым тӱлаш пуэн кертыт, але 480 шагат пашам ыштыктат.
Кидыш пуаш – законлан тореш каяш
Могай взятке изилан але кугулан шотлалтеш?
Д.Семёнова
Йошкар-Ола.
Йодышлан Медведево районысо прокурорын кугурак полышкалышыже Л.Давлетшина вашештен:
– РФ Уголовный кодексын 291.2 статьяж дене келшышын, изи взяткылан 10 тӱжем теҥге марте оксам айдемылан шканжак кидыш але посредник гоч пуымо шотлалтеш. Тыгай закондымо ошкыллан 200 тӱжем теҥге марте але судитлыме еҥын кум тылзе марте налме пашадарже, але моло доходшо кугыт штраф пуалтеш, але идалык марте исправительный пашаш колтат, але 2 ий марте эрык шотышто чаракым ыштат, але идалык марте эрык деч посна кодат.
Ты статьянак кокымшо ужашыштыже ончыкталтын: тыгаяк закондымо ошкылым РФ Уголовный кодексын 290, 291, 291.1, 291.2 статьяшт почеш ончыч судитлыме еҥ ыштен гын, тудлан 1 миллион теҥге марте але идалык марте судитлалтме пагытыште налме пашадар але моло доход кугыт штраф пуалтеш, але кум ий марте исправительный пашаш колтат, але 4 ий марте эрык шотышто чаракым ыштат, але кум ий марте эрык деч посна кодат.
С.Носова ямдылен.
