У коронавирус инфекций дене черланыше пациент-влаклан полшышо медицине пашаеҥ-шамычлан ешартыш социальный выплатым тӱлымӧ нерген ойлат. Тудыжо ончычат ыле огыл мо?
О.Игнашева
Волжский район
Йодышлан Марий Элын Тазалыкым аралыме министерствыжын пресс-службыштыжо тыге вашештеныт:
— COVID-19 дене инфицироватлалтше-влаклан медицине полышым пуымо годым пашан ойыртемжылан да ешартыш нагрузкылан, тыгак поснак кӱлешан пашам шуктымылан медик-шамычлан 2020 ий 1 ноябрь марте кумылаҥдыше шотан выплатым Россий Федераций правительствын распоряженийже почеш тӱлымӧ.
2020 ий 1 ноябрь гыч РФ правительствын пунчалже дене келшышын, у коронавирус инфекций дене черланыше пациент-влаклан полышым пуышо медицине да моло пашаеҥлан палемдалтше кумылаҥдыше выплатым специальный социальный выплат дене вашталтыме. Тиде окса Социальный страхований фонд гоч ойыралтеш.
Марий Элым вуйлатыше Александр Евстифеев тиде выплат пелен эше вашкеполыш бригадын врачше ден кокла медперсоналже, тыгак инфекционный стационарлаште коронавирусан пациент-шамычлан специализироватлыме медицине полышым пуышо врач, кокла да изирак медицине пашаеҥ-влаклан ноябрьлан да декабрьлан ешартыш социальный выплатым тӱлымӧ нерген указым луктын.
Палемдыме выплатлан 37687,6 тӱжем теҥге бюджет ассигнованийым ойырымо.
М.ИВАНОВА
