Шукерте огыл ик палымем гараж амнистий нерген ойлаш тӧчыш. Тиде мо тыгай? Граждан-шамычлан мом пуа?
И.Топоров
Йошкар-Ола
Йодышлан Марий Элыште Росреестрын виктемыштыже тыге вашештышт:
– РФ Экономический вияҥмаш министерстве гараж да тудым налме порядке нерген федеральный законын проектшым ямдылен. Тудын дене келшышын, документдыме гаражым собственностьыш оформитлаш да участкым налаш лиеш.
Кызыт законодательствыште гараж-чоҥымо кооперативын пашажым регламентироватлыше посна нормативный правовой акт, «гараж» да «гараж-чоҥымо кооператив» умылымаш уке.
Законын проектше «индивидуальный гараж», «шуко пачашан гараж», «гараж бокс», «гараж кооператив», «капитальный огыл гараж» мут-влакым пурташ темла. Тыгодым «гараж кооператив», «гараж потребительский кооператив» да «гараж-чоҥымо кооператив» умылымаш-влак ик акан лийыт.
Законын проектше гараж верланыме мланде участкым налме механизмымат рашемда.
Кызыт шке участкеш чоҥымо гаражым простаҥдыме схеме почеш оформитлат. Тидлан объектын технический планже, мланде участкылан оза улмым пеҥгыдемдыше документ гына кӱлыт. Кугыжаныш пошлинын акше – 350 теҥге.
М.ИВАНОВА
