6 мартыште Медведево район Песчаный посёлко воктене сонарзе биатлон дене республик кӱкшытан XII таҥасымаш эртен. Тушто чылаже 16 команде вийжымс терген. Уна-влак Кировский ден Нижегородский областьла, Чуваш Республик гычат лийыныт.
Тений мо оҥайже: пӧръеҥ команде-влак коклаште икымше гана ӱдырамаш сборный вийжым терген. Ваче гоч пычалым сакен, сонарзе ечым чиен куржталше ӱдырамашыже ӱмаште икымше гана Киров область гыч лийын. Такшым моторна-влак 8 Март пайрем деч ончыч ты мероприятийыш шкешотан ойыртемым пуртеныт.
Таҥасымаште участник-шамычын ечышт 15 сантиметр деч аҥысыр да, тыгодым крепленийжат кылдышан лийшаш огытыл. Тыгак вич километр кужытым тоя деч посна кайыман. Ик йырым, 2,5 километрым эртымеке, участник 25 метр кужыт гыч сонарзе пычал дене мишеньыш лӱйкалышаш. Тудо ты гана 10 патроным кучылтшаш ыле. Чаманен каласыман, тыште да тиде таҥасымаште шукышт штрафым налыныт.
Биатлон дене сонарзе-влакын мероприятийыштым ончаш, оҥай татшым шарнымашеш войзаш мыланемат йӧн лекте.
Мутат уке, марий кундемна чодыралан поян. А кунам пӱртӱс лоҥгаш логалат, тудын моторлыкшым ончен, яндар южым шӱлалтен пайдалын канаш мондыман огыл, шонем. Чевер шошо кече уна, тыгак участник-шамычын кумылыштым нӧлтен, кечыйолжо дене ырыктен. А южым авалтыше сылне муро сем пайрем шӱлышым пуртен. Организатор-влак ечыгорным ончылгочак таптен ямдыленыт. Кож ден пӱнчӧ коклаште тасма гай шуйналтын, серпантин семын кадырген палемдалтын. Йырым-йыр ончалат да, чылт йомак чондайыш логалметла чучеш. Свежа мамык лумжо пушкыдо тӧшакым шарныктен. Изиш ӧрдыжыш тошкалат кыдал даҥыт пуреҥгает. Теве тыгай сылне кундем илыме вер, ола деч тораштырак, сандене ты гана ончаш толшыжо шагалрак лийын. Адакшым лӱмынак тушко каяшыжат йӧндымырак. Но ончыкыжым организатор-влак тидым шотыш налаш сӧрышт.
– Мыйын шонымаште, чылажат сайын эртен. Ечыгорно, лӱйылташ посна вер… Тидым чылт спорт таҥасымаш манаш ок лий, но сонарзе команде-влак чолга лийыныт. Сылне вер-шӧр изиш торарак, тышке логалаш изиш йӧндымырак, сандене тышке толаш кумылан-шамычлан транспорт шотыштат шоналтена. Тыште лӱйылташ вержат лач тидак веле лицензиан. А тений пандемийлан кӧра командат, ончаш толшат шагал лийыныт, адакшым ӱжмат огыл. Ончыкыжым тиде эрта, чылажат сай лиеш да уна-влакым мелна, шокшо кочкыш денат сийлаш тӱҥалына, шонем, – пеҥгыдемдыш Марий Эл Республикын пӱртӱс поянлык, экологий да йырым-йырысе средам аралыме министрже Алексей Киселев.
Таҥасымаште икымше верыш Марийский НПЗ (В.Байков, М.Есменеев, В.Веселов) команде лектын. Нунылан кажныштлан бензопилам кучыктеныт. Оршанке район гыч толшо команде ший призёр лийын. Участник-шамычлан сварке наборым кучыктеныт. Кумшо верым Кужэҥер районын командыже налын. Нуно мӧҥгышкышт шуруповёртко дене пӧртылыныт.
Мутат уке, ӱдырамаш командыланат сонарзе дене кылдалтше шарнымашан пӧлекым кучыктеныт.
Сонарзе-влак коклаште эртаралтше спорт мероприятийыште эн опытанлан шотлалтше Михаил Есменеев (Марийский НПЗ) мӧҥгышкыжӧ шарнымашан пӧлек дене пӧртылын.
Лийын тыгаят: Оршанке районышто тыгай сынан мероприятийыште кумылан-влак маскайол (снегоступ, тиде ты кундемыште вияҥаш тӱҥалын) дене куржталын таҥасеныт. Участник, тыгак толшо-влак шкеныштым тӱрлӧ конкурслаште тергеныт. Ялысе сатум, ӱзгарым налашат йӧн лийын. Участник-шамычым шокшо кочкыш, тутло чай дене сийленыт, концерт программе дене куандареныт.
– Чынак, тыгай мероприятийым эртарымаш йӱлаш пурен. Ончыч Оршанке район Тошто Крешын ял воктене таҥасымаш эртаралтеш ыле, но теве кокымшо гана Песчаный ял воктеке, чодырашке лӱйкалыме верыш кусарыме. Тидыже изиш ончаш шонышо-влаклан чаракым ышта. Лӱмын толаш нелырак. Сандене еҥжат шагалрак. Вийым тергаш шонышо-влак йӧным муыныт, толыныт, тау чылаштлан, – ойла Сонарзе ден пийым ашныше-влакын Марий региональный обществыштын председательже Г.Тихонов. – Куан увер теве могай. Тений Кӧрдӧ ялыште Россий кӱкшытан сонарзе турслётым эртарена. Тудыжо сонарлыме тургымым тӱҥалме деч ончыч 14 августышто лиеш. Чыладам спорт пайрем дене саламлем, тазалыкым, пиалым тыланем.
Е.ЭШКИНИНА
Авторын фотожо
