Пелемарафон
Икымше – Шернур гыч куштылго атлет
Российын Сбербанкше «Зелёный марафон» спорт мероприятийым эртарен. Тудо Йошкар-Олан кечыжлан пӧлеклалтын.
Ты проект «Вклад в будущее» поро полыш фондын полшымыж дене Российын моло олаштыжат эртаралтеш.
Куржталмашке тӱрлӧ ийготан еҥ ушнен. Старт Царевококшайский кремль воктене пуалтын. Тӱҥ трассе олан исторический верлаже дене эртен. Набережный мучко куржмо поснак моторын койын.
XXXVIII пелемарафонын абсолютный чемпионжо – Шернур посёлко гыч Алексей Ахтямов. 21,1 километрым тале спортсмен 1 шагатат 11 минут 21 секундышто эртен.
– Куржаш сай ыле, келшыш. Лач тыгай ласка кумылжо дистанций мучкылан ситен огыл: финиш марте 4 километр деч ончыч, можыч, 28 градус шокшылан кӧра, йолын куштылгылыкшо йомо. Пеш кугу тау Шернур землякем-влакын кумылаҥдымыштлан, – палемден Алексей.
Шернур куштылго атлет ты пелемарафонышто вийжым тергаш ончылгоч Андрей изаж дене ямдылалтын, тренировкым шке гыч эртарен.
10 километрыште икымше верым Морко посёлко гыч Николай Соколов налын, а 5 километр кужытышто Йошкар-Ола гыч Егор Кузнецов эн ончыко лектын. Кажне участник вӱдым йӱаш тыршен да вуйжым кепке да моло петыртыш дене шокшо кечыйол деч аралаш тыршен.
Ушештарена, ты гана Йошкар-Оласе ужар марафон Сбербанкын эртарыме «Зелёный марафон» дене ушалтын. Сандене Йошкар-Ола ола округ администрацийын физический культур, спорт да молодёжный политике управленийже, «Сбербанк» ПАО, «РА Волга» ООО Марий Элын Самырык-влакын политике спорт да туризм министерствыж дене пырля эртареныт.
Е.Эшкинина.
Снимкыште: старт пуалтын.
М.Могонован фотожо.
Лудаш темлена:
