Кеҥеж каныш мучашке лишемеш. Тыгодым кажне айдеме шке жапшым пайдалын эртараш тырша. Оҥай, а спортсмен-влак кузерак? Икте сборышто километр почеш километрым пога, весе таҥасымаште вий-куатшым терга. Ялысе спорт шотышто кузерак? Кызыт лач спорт турист-влаклан йӧнан жапыс…
Пытартыш жапыште республикыштына тиде вид палынак вияҥеш. Тунемше-влак сай результатым ончыктат. Марий Элын сборный командыже Россий, тӱнямбал кӱкшытыштат сай результатыш шуыт. Тидым шотыш налын, Шернур кундемысе Марисола селаш тарванышна. Молан? Ты кундемыште спорт туризмлан кугу тӱткышым ойырат, сандене.
Игечыжат куандарыше ыле. Села шке моторлыкшо, арулыкшо дене ойыртемалтеш. Ужар сывыным чийыше пушеҥе-влак коклаште верысе калык йырым-йырысе кумдыкым тӱрлӧ сылне пеледыш дене сӧрастарен. Теве школ кудывечыштат еҥ-влак койыч. Мыят ӱшанлын нунын дек ошкыльым. Адакшым лач турист-шамычак котомкаштым, малыме мешакыштым сакалтылын куржталыт ыле. «Кавказ курыклаш каяш ямдылалтына. Паша пеш шыгыр», – умылтарыш спорт туризм дене тренерышт Е.Павлов.
Физкультурым туныктышо З.Максимоват полышкалаш толын. Вес семынже ок лий. Нуно икой дене пашам ыштат. Зоя Николаевна телым ечызе-влакым ямдыла гын, нине тунемше-влакак Евгений Альбертович дене спорт туризм дене таҥасымашке пырля лектыт.
Спортзал, ер, полигон, курыкла…
Е.Павловын воспитанникше-влак арняш кум гана тренировкым эртарат.
– Мемнан паша тыгай, а шонымашнаже – тунемшына-шамычым Марий Элын сборныйшкыжо ямдылаш. Кеч-могай тургымышто, игечым ончыде, тренировкыш лектына. Спортзалыштат, шке ыштыме полигоныштат ямдылалтына. Кеҥежым Немда эҥер, ерла воктеке походыш лектына. Кавказ курыклашкат миен толына. Тидыже йӱлаш пурен. Мутат уке, ача-ава-влакын полышышт дене, конешне, – ойла Е.Павлов. – Села воктенсе карьереш спорт туризм дене заниматлаш, ямдылалташ мо кӱлешым келыштарен, чапле верым ыштенна. Ечызе-влакланат келшен толеш. Зоя Николаевна ече дене ямдыла гын, мый – техничесий этаплан. Тыге спорт туризмым вияҥдаш тыршена. Икте-весым умылен, икте-весылан полшен, результатшат сай лектеш.
Кумданрак — «Марий Эл» газетын
2018 ий 24 августышто лекше номерыштыже лудын кертыда.
Е.Эшкинина.
