1 август гыч Марий Элыште кугыеҥ-влаклан профилактике шотан медосмотр ден диспансеризацийым угыч эртараш тӱҥалыныт.
Россий Минздравын у коронавирус инфекций шарлыме лӱдыкшӧ аралалт кодмо условийыште ямдылыме методический темлымашыже-влак дене келшышын, поликлинике-влак тиде пашалан кӱлынак ямдылалтыныт. Нуно профосмотр ден диспансеризацийым эртышаш граждан-влакын спискыштым ямдыленыт. Ты гана тушко 65 ий деч кугурак илалше еҥ-влакым, тыгак бронхо-шодо, шӱм-вӱргорно, эндокринный системыла дене кылдалтше хронический черан пациент-шамычым пуртен огытыл. Медпашаеҥ ден страховой медицине организаций-влак коклаште кылым ышташ манын, спискым страховой компанийыш пуэныт.
Поликлиникым вуйлатыше-влак, пациент-шамычлан грамотный маршрутизацийым ямдылен, кидыштым обработатлаш, капкыл температурыштым висаш, тыгак врачын приёмышкыжо да медшымлымашке ончылгоч возалташ йӧным ыштен, COVID-19 дене черланен кертме лӱдыкшым лийме семын иземдат.
У коронавирус инфекций дене черланыше-шамыч медосмотр ден диспансеризацийым пареммышт деч вара гына эртат.
Пациент-влакын иквереш погынен кертме верлаштышт 1,5 м деч шагал огыл социальный дистанцийым кучаш кӱлмым ушештарыше палым ыштыме.
Икмыняр жаплан пуртымо методический темлымашлаште тыгак калыклан диспансеризацийым эртарыше медпашаеҥ-влак коклаште черланыме деч мере комплексым шотыш налме.
М.ИВАНОВА
