«СССР-ын почётан доноржо» але «Российын почётан доноржо» знак дене палемдалтше-шамычлан 2019 ийлан окса выплатым ыштыме.
Марий Эл Республикын Социальный вияҥмаш министерствыжын увертарымыж почеш, тиде окса кредит организацийласе счётлашке лишыл жапыште миен шуэш. Социально полшымо тиде мерым шукташлан средства федеральный бюджет гыч ойыралтеш. Выплате идалыклан ик гана, но 1 апрель деч вара огыл ышталтеш. 2019 ий 1 январь гыч тудын кугытшо 14145, 98 теҥге лийын да ӱмашсе деч 583,2 теҥгелан (4,3%) кӱзен.
2018 ийыште Марий Элыште тыгай выплатым 3326 еҥ налын, роскотын кугытшо 45,6 млн. теҥгеш шуын.
«Российын почётан доноржо» знак дене палемдалтше граждан-шамыч ий еда тӱлыман выплатым налшашлан калыклан социально полшымо верысе рӱдерыш йодмаш дене мийышаш улыт. Тыгодым пелен эше РФ гражданинын паспортшым, «Российын почётан доноржо» знакын удостоверенийжым да ий еда тӱлыман выплатым колтышашлан счётын реквизитшым кондыман.
М.ИВАНОВА.
