Таче, 9 апрельыште, Марий Элыште у коронавирус инфекциян ик пациент колен. Регионым вуйлатыше Александр Евстифеев тудын родо-тукымжылан чаманымашым каласен.
Йошкар-Оласе больницын инфекционный отделенийыштыже ӱмыр лугыч лийше ӱдырамашлан 37 ий лийын. Медик-влакын мутышт почеш, пациент шуко хронический чер дене орланен. Врач-шамыч мо лиймым чыла ыштеныт гынат, черлын илышыжым утарен коден кертын огытыл.
«Коронавирус дене кучедалме шотышто чыла мерым ыштыме гынат, таче республикыштына тудын деч колымо икымше случайым регистрироватлыме. Пациент инфекциян вес еҥ дене кылым кучымылан кӧра черланен. Сандене Марий Элыште илыше чыла еҥ деч посна улмо режимым пеҥгыдын шукташ йодам. Россий Президентын да Марий Эл правительствын ыштыме мерышт у коронавирус инфекцийын шарлымыж ваштареш виктаралтын. Нуно граждан-влакын илышыштым да тазалыкыштым аралаш кӱлыт», – палемден республикым вуйлатыше.
Александр Евстифеев илыш гыч кайыше ӱдырамашын родыж ден лишыл еҥже-влаклан чаманымашым каласен.
«Тиде пӧртылташ лийдыме йомдарымаш. Тыгай татыште Марий Элыште илыше-влак пеленда улыт», – ешарен тудо.
Марий Элым вуйлатышын организаций да
аналитике виктемжын уверже негызеш М.ИВАНОВА ямдылен
