«Вольыкым ашнем, сандене пырче лачеш толын», —
ойла Советский район Кукмарий ялыште илыше, «Марий Эл» газетым лудшо-влак коклаште эртарыме лотерей дене 5 мешак пырчым модын налше Л.Губина.
Любовь Николаевна Кукмарий кундемысе Пивактын почиҥга ялыште шочын, пошкудо Кукмарий ялыш марлан лектын, ешым чумырен. Ӱмыржӧ мучко Сергей пелашыж семынак «Красный Октябрь» колхозышто тыршен. Поварлан тунем лектын, тӱшка озанлыкын столовыйыштыжо кочкышым ямдылен. Варажым ушкал комплексыште доярке пашамат шуктен. Илен-толын колхоз лӱмжымат вашталтен, вуйлатыше-шамычат весе лийыныт. Ынде шурным да кургылык кушкылым ончен куштышо изи озанлык веле кодын. Туштыжо ӱдырамаш-шамычлан паша вер уке. Тыге Губина паша деч посна кодын. А ялыште моло вере ешартыш паша лектын огыл. Тыге шке озанлык кӱшеш илен лекташ логалеш.
Чаманен каласыман, вич ий ончыч нылле куд ийым темыше Сергей пелашыжын (тудо колхозышто водительлан тыршен) ӱмыржӧ кенета кӱрылтын. Тыге кок эргым шкетын ончен кушташ кодын. Кызыт Игорь эргыже «Юлтех» университетын икымше курсыштыжо тунемеш гын, Евгений Ӱшнур кыдалаш школын луымшо калссыштыже шинчымашым погаш тӱҥалын.
Л.Губина ешыж дене ялысе шуко моло тыгаяк еҥ-влак семын вольыкым, сурткайыкым онча, пакчасаскам, пареҥгым кушта. Шӧрым, ӱмбалым, ӱйым, торыкым Йошкар-Олашке шупшыкта. Тыште налшыже-влак эре иктак улыт, посна пачерлашке конден ужала. Кунамже ял гыч олашке кайыше автомашина дене толеш, кунамже Советский посёлко марте коштшо рейс автобусыш шинчеш. Тиде гана сатужым ужалаш толынат, редакцийыш модын налме пӧлекшым налаш пурен ыле.
— Кажне гана олашке толмо годым ик тӱжем утла теҥгеаш сатум ужалем, — ойла Любовь Николаевна. – Кок эргым эше туныктен лукман, сандене окса эреак кӱлеш. Нуно коктынат сай полышкалыше улыт. ГАЗ автомашинана уло. Кургым ямдылыме годым шудым шупшыкташ руль воктеке кугурак эргым шинчеш. Вольыкымат черет дене кӱтыман. Тиде сомыл адак эргым-шамычлан логалеш. Ялыштына кок кӱтӱ уло. Кокытыштыжат тӱкан шолдыра вольык витле наре вуй шотлалтеш. Ончыч вольык ятырлан шукырак лийын. Но ынде ик ешыштак шуко ушкалым ашнышыже шагалын огытыл. Теве Созоновмыт еш вич ушкалым куча, Бурмановмыт еш – нылытым. Кокыт-кумыт дене ашныше-влакат ятырын улыт.
Любовь Николаевна кызыт кок ушкалым, кок ӱшкыжым, тынарак презым ашна. Шошым кок ӱшкыжым пукшен ӧрдыктарен ужален. Тений сӧснаигым налын. Шке ешлан шыл лийже манын. Эше ятыр вуй лудыжо, комбыжо, чывыже улыт. Шудым ямдылаш кугу нелылыкак уке гын, пырчым ий еда кок тонн наре налаш перна да тидлан шагал огыл оксам луктын пышташ логалеш. Йӧра кеч пареҥгыже начар огыл лектышан. Ончычсо ийлаште тудым шагал огыл ужален. А тений эше сӧсналанат ешартыш курго кӱлеш.
— Марла лекше газетым лудаш моткоч йӧратем, — ойла Л.Губина. – Эше авам дене пырля илыме годымак «Марий коммуным» эре налын шогенна. А ынде «Марий Эллан» кажне гана возалтам. Тудын чыла лаштыкшым лудын лекташ тыршем. Газетын эртарыме лотерей дене пырчым модын налмемлан моткоч куаненам. Вет вольыкем шуко, пырчым ий еда налман. А ынде модын налме пырче ешартыш шӱкалтыш лиеш.
В.Смоленцев.
Авторын фотожо.
