Волжск олаште «Заря» микрорайонысо 2-шо №-ан да «Машиностроитель» микрорайонысо 3-шо №-ан монча-влак волжан-шамычым «мушкаш» ямде улыт.
«Банно-прачечный озанлык» ООО-н пашаеҥже-влак нине мончаште запорный арматурым, коҥгам олмыктеныт, вӱдым ырыктыше приборым мушкыныт, термостатым, олтымо насосым вашталтеныт. Тидын деч посна котельныйлаште эше газ счётчик-влакым олмыктеныт, газ лекмым, утыждене погынымым шижше сигнализаторым тергыктеныт, олтымо да канализаций пуч-влакым ужашын вашталтеныт, тошкалтыш маршым, вургемым кудашме, вашталтен чийыме да мушкылтмо пӧлем-влакым шотыш конденыт.
Икманаш, сад-пакча тургымым мучашлыше-влак ынде ялышке да дачышке кудалыштдеат кертыт, вет нуным чыла шотыштат чапле да лӱдыкшыдымӧ кок монча вуча.
М.ИВАНОВА.