СПОРТ

Виян тукымын ӱмыржӧ кужу

23 мартыште Тюменьыште IX всероссийский ялысе теле модмаш иктешлалтын. Таҥасымаште элнан 57 субъектше гыч 956 участник вийжым терген. Марий Элын чапшым аралыше сборный команде гыч Новосёловмыт еш (У Торъял) чыла еш команде коклаште кумшо верым сеҥен налын. 

Лач ты кечынак Йошкар-Оласе «Спартак» ФОК-ышто «Виян тукымын мучашыже уке» республик кӱкшытан спорт конкурс лийын. Тушто  тений регионнан тӱрлӧ районжо да олалаж гыч 13 еш  команде таҥасен.  Участник-шамыч тӱрлӧ эстафетышке ушненыт, оҥай да пайдале еш архивым ончыктеныт.

Посна ойырымо спортзалеш жаплан пуйто изи ял чоҥалтын. Кажне «сурт» – шкешотан, посна историйже, йӱлаж дене ойыртемалтше. Стендлаште спорт дене кылдалтше ӱзгар, экспонат, кубок, медаль-влакым, шке ямдылен кондымо кочкышым, эсогыл икмыняр тӱрлӧ выньыкымат ужынна.

Ончаш толшо-шамыч мончаш пурымо дене кылдалтше кӱлеш ой-каҥашым налын кертыныт. Ожнысекак паленыт: монча капкылым кандара, пеҥгыдемда, осалым поктен луктеш, чер деч арала. Арам огыл тушко пурымо, пӱжалт моштымо, выньык дене кырыме правил-влак улыт.

Походын пайдаже нергенат каласкаленыт. Икманаш, участник-шамыч тазалыкым пеҥгыдемдыме шуко моло йӧнымат сайын почын пуэныт.

– Тыгай сынан мероприятий 1994 ийыште стартым налын. Кундемыштына тӱҥалтышым 2001 ийыште «Эрвий» организаций ыштен.  Ончыч кажне ийын эртаралтын гын, варажым – кум ийлан ик гана, – ойла организатор М.Маланова. – «Еш архив» да «Виян тукымын мучашыже уке» спорт еш конкурслам иктеш ушымо. Мемнан шонымашна: тиде шкешотан, оҥай, пайдале конкурсыш шукырак ешым ушнаш кумылаҥдаш. Чаманен каласыман, тӱрлӧ амаллан кӧра икмыняр еш команде толын кертын огыл. Тыге шарнымашан да социально кӱлешан мероприятийыш ушнен, ача-ава, икшыве-влак лишкырак лийыт, икте-весым пагалаш тунемыт, умылаш тӱҥалыт. Тыгай кыл пытартыш жапыште лушкыдемын. Икшыве пуйто еш деч посна кушкеш. А вет еш пеҥгыде лиеш гын, элнажат пеҥгыдемеш. Адакшым ты мероприятий шке тукым вожым шымлаш тарата. Мутлан, Волжский районысо Тимофеевмыт еш кугезе ковашт Ксения Кошаеван 1940 ийыште Москошко колхозник-влакын Икымше всесоюзный спартакиадыштышт шочмо республикнан чапшым аралыме нерген сай материалым поген, тидым молылан сайын почын пуэн.

Спорт министерствын полышыжлан кугу тау: пайремлан верым ойырен.  «Виян тукымын мучшыже уке» конкурсышто икымше верым Курыкмарий район гыч Рожковмыт (Андрей Владимирович, Светлана Игоревна, Денис ден Илья эргышт) сеҥышыш лектыныт.

– Таза илыш-йӱлам кучаш тыршена. Икшывына-влак спорт дене пеҥгыде кылым кучат. Таза лияш манын, сай да качестван кочкышым ямдылена. Шкеак емыж-саскам погена, коштена, киндымат шкеак кӱэшташ тыршена. «Физкультур да тазалык» ӱжмаш дене илена. Тидлан ныл икшывынам кумылаҥдена, – ойла озавате.

Кокымшо верым Кужэҥер район гыч Амосовмыт (Светлана Анатольевна, изаже Анатолий Эдуардович, Аня ден Диана) налыныт. А кумшо призёрыш кок еш лектын: Марий Турек район гыч Потаевмыт (Павел Сергеевич, Анна Анатольевна,  Рома ден Иван эргышт) ден Морко район гыч Алексеевмыт (Алексей Евгеньевич, Эльвира Владимировна, Аня ден Антон икшывышт).

Чыла участник-еш командылан шокшо чайым подылаш термосым кучыктеныт. Тидыже я йӱштӧ телым але шошым, кеҥежым, чодыраш, походыш але таҥасымашке лекме, ече дене мунчалтыме годым эн  кӱлешан. Тыгак чот ойыртемалтше еш команде-влаклан посна пӧлекым кучыктеныт.  

Ты мероприятий шукыштлан пайдале каныш семын эртен.

 

Е.Эшкинина.

Опубликовать в Одноклассники

Добавить комментарий