Ты гана Павел Плотников ден Александр Туруевым суд тӱҥалмеке веле конвой дене кондышт. Кечывал деч ончычсо заседанийыш ик свидетелят толын огыл ыле гын, кечывал деч варалан ныл еҥым муын кертыныт. Тыгодым эше кум свидетель огеш лий манын секретарь палдарыш: икте республикысе районышто пашам ышта да толын огеш керт, весылан толаш йыҥгыртен каласаш йӧн лийын огыл — эре «не доступен» улмаш, кумшо 28 мартысе колыштмаште лияш сӧрен.
Кыл — паша дене гына кылдалтше
Икымше показанийым «Столица-Строй» фирмын кызытсе директоржо Дмитрий Мирошин пуыш. Але марте тудым титаклыме еҥ — Александр Туруев — вуйлатен. Свидетельын ойлымыж почеш, ӱмаште 20 мартыште учредитель-влак Туруев ден Надежда Пашкова ты пашам Мирошинлан шукташ тӱҥалаш темленыт. Палемдымыж почеш, директорлан шогалмыж годым организацийын подрядчик, поставщик-влаклан да КУМИ-лан (комитет по управлению миниципальный имуществом — авт.) мландым арендоватлымыжлан чылаже 22 миллион утла теҥге парымже улмо нерген пален. Туруевын ик адвокатшын, Владимировын, тудын Плотников дене кылже могай улмо нерген йодмыжлан Мирошин «деловой гына» мане. Тидыже адвокатым чот ӧрыктарыш, да тиде тыге веле огыл улмо шотышто кокытеланымашым лукшо икмыняр смс-ым лудын пуыш. Нуныжым Мирошин ден Плотников икте-весыштлан колтылыныт. Тиде мо тыгай улмым умылтараш йодмылан свидетель 51-ше статьялан эҥертыш да нимомат ыш вашеште. Тыгак адвокат «Столица-Строй» (СС) организаций нерген кид дене возымо документын копийже нерген мутым тарватыш. Тушто «СС» дене мом ышташ, кузе пайлышаш нерген серыме. «Тидым те возенда?» — йодмылан Мирошин тыге мане:
— Почерк мыйын гай коеш, но мый возен омыл.
Тунам Туруев деч умылтараш йодыч.
— Тидым Дмитрий Мирошин возен. Документым пырля ямдыленна. Тидлан 6-7 гана вашлийынна. Тушто «СС»-ым пайлыме нерген, кӧлан мом пуышашым пырля возенна, — мане.
Тылеч вара адвокат йодо: «Столица-Строй» фирмым тудын, Мирошинын, вуйлаташ тӱҥалмыж деч вара улшо парым шотышто ола администраций дене суд лиймым чарнен мо?
— Чарнен огыл. Нуно кызытат шуйнат. Тиде веле огыл, лум ора семын кушкын толыт, — мане свидетель.
Умбакыже кокымшо свидетельым ӱжыктышт. Тиде Павел Плотниковын олан мэрже улмо годым приемныйыштыжо пашам ыштыше еҥ ыле. Пуымо йодыш-влаклан мом палымыжым вашештыш гынат, Туруевын адвокатше-влаклан тиде ыш келше.
— Нимом раш вашештен, умылтарен огеш керт гын, молан тыгай еҥым свидетель-влак радамышкыже пурташ кӱлын, — ӧпке мутым ойлышт.
«Илышыж верч лӱдын дыр»
Кумшо свидетель Олег Бакунов ыле. Тудо Александр Туруевын охранникше лийын.
— Александр Анатольевич дене кок ий наре наре палыме улына. Мый тудын дене пачер кӧргыж деч моло чыла вере гаяк пеленже лийынам. Тудым пушташ тӧчымӧ деч вара шке илышыж верч лӱдын да сандене оролым пашаш налын, очыни, — умылтарыш свидетель.
Шереметьевым палыме шотышто йодмылан «тудым мый преступник семын палем», — мане.
Павел Плотниковын адвокатше Туруевын пеленже оружий лийме-уке нерген йодмыжлан Бакунов вашештыш:
— Травматический оружийже лийын, боевойжым ужын омыл.
Туруевын могай айдеме улмыж, шкенжым кузе кучымыж нерген йодмеке, свидетель ик исторйым шарналтыш:
— Тудо ласка, шкенжым кидыште кучен моштышо айдеме. Икана сонарыште лийме годым шордо презе тудын деке 10 метр наре лишке толын ыле. Но Александр Анатольевич тудым ыш лӱй, «браконьер омыл» манын, колтыш.
Иктышт толыныт, но каеныт
Пытартышлан Туруевын личный водительже, 20 утларак ияш Денис Чучелин, свидетель семын показанийым пуыш.
Визымше свидетель, Саврасов, палемдыме 13 шагатлан судыш толын улмаш, но, судьян палдарымыж почеш, показанийым пуаш тӱҥалмешкыже вучен шуктен огыл, каен. Тыгай койышат Туруевын адвокатше-влаклан моткоч ыш келше.
Эше кум еҥ ты заседанийыш толын кертын огытылат, нунын тылеч ончыч пуымо показанийыштым прокурор-влак лудын пуышт. Нунын кокла гыч иктыже Павел Плотниковын пелашыжын йолташ ӱдыржӧ, весыже «Марийский бетон» компанийын ик учредительже лийыныт.
Шочмын да кушкыжмын колыштмаш-влак умбакыже шуйненыт.
Любовь Камалетдинова.
