Республикыштына у коронавирус инфекцийым кондымым да шаркалымым шижтарыме шотышто оперштабын 12 августышто эртыше заседанийыштыже регионым вуйлатыше Александр Евстифеев утларак ямде улмо режимым 6 сентябрь марте шуйымо нерген увертарен. «Вийыште кодшо чараклыме мероприятий-влак тӱҥ шотышто Роспотребнадзорын темлымыж дене кылдалтыныт», — рашемден тудо.
Роспотребнадзорын Марий Элысе виктемжым вуйлатыше Светлана Булатован мутшо почеш, республикыштына COVID-19 дене черланыме чот иземын толеш. Кызыт таза еҥ-влакымат тергаш тӱҥалме. Пытартыш жапыште школ деч ончычсо йоча тӧнеж ден санаторийлан пашаеҥыштым тестироватлат, тыгак вирусын йырым-йырысе средаште пӧрдын коштын кертмыжым, ӱмбал лончым, пӱртӱсысӧ да йӱшаш вӱдым шымлат. Тымарте тергыме пробылаште вирусым мумо огыл. Ончыкыжым йогышо ден бассейнысе вӱдымат тергаш палемдыме.
Пневмоний дене черланыме чотат иземын толеш. Инфекцийым регистрироватлаш тӱҥалме 32-шо арняште 351 случайым рашемдыме, тидыже тылеч ончычсо арня деч 10 процентлан шагалрак.
Пашам ышташ тӱҥалше объектлаште противоэпидемический мероприятийым эскерыме мониторинг умбакыже эртаралтеш.
Шыжым ОРВИ, ОРЗ да грипп дене поснак шуко еҥын черланен кертмыжым шотыш налын, С.Булатова регионысо Минздравлан вакциным шеледыме да иммунизаций графиклам ямдылаш, прививкым ыштыше бригадым чумыраш темлен.
Тазалыкым аралыме министрын амаштышыже Татьяна Королеван палдарымыж гыч, кызыт коронавирусан черле-влак профильный 620 койко гыч 44,5 процентыштыже кият.
«Ончычсо семынак утларак пациент пневмоний дене орлана. 48 процент черлылан кислород кӱлеш. ИВЛ-аппаратыште улыжат 3 еҥ кия. Но пытартыш жапыште 30 процент наре черле стационарыш неле состоянийыште толеш, да нуным вигак гаяк реанимацийыш пышташ логалеш», — палемден Т.Королева да медорганизацийлаште пайдаланыдыме ковидный койко-влакын чотыштым шочмо гыч 85 марте шагалемдаш темлен.
Койко фонд нерген радамынрак каласкалаш гын, 620 гыч 59 койкыштыжо ИВЛ пашам ышта. 10-11 августышто республикышкына централизоватлыме поставке кышкарыште эше 22 аппаратым кондымо. Август мучаш марте эше 43 оборудованийым шындаш палемдыме. 11 августышто Российын Минздравше сай увер дене куандарен: регионлан эше 10 ИВЛ-аппаратым чылт яра пуат.
17 август гыч COVID-19 дене черланыше але коронавирусан черле-влак дене пашам ыштыше медпашаеҥ-влакын кокымшо тӱшкашт санаторийыште реабилитацийым эрташ тӱҥалеш.
Марий Элым вуйлатыше верысе Минздравын калыкым вакцинироватлаш ямдылалтме радамже нерген йодыштын да прививкым эн ончычак туныктышо ден врач-влаклан ышташ кӱлмым палемден. Тыгак стационарыш план почеш эмлалташ вочшо пациент-влакым умбакыже тестироватлаш каласен. Тылеч посна коронавирусан пациент-шамычым эмлаш ойырымо отделений гыч эркын дене профильный пашашке пӧртылаш да ОРВИ, пневмоний палан пациент-влаклан респираторный инфекций дене черланен кертмышт шотышто дифференциальный диагностикым эртараш кӱлмым палемден.
Марий Элым вуйлатышын организаций да аналитике виктемжын уверже негызеш М.ИВАНОВА ямдылен
