Кодшо арняште да тулеч ончычат игече икмынярлан саеме, ояр да шокшо кечат куандарыш гынат, коклан-коклан йӱр садак опталын кайыш. Тыге тӱшка озанлык, тыгак шке сурт-пече пелен вольыкым ашныше-влакланат кургым ямдылаш йӧн кунар-гынат саеме. Тыге 24 июльлан шотлымаште тӱшка ден фермер озанлык-шамыч чылаже 18,5 тӱжем тонн кукшо шудым ямдыленыт. Тидыже палемдыме кугытын 39 процентше лиеш. Кодшо ийын тиде жаплан 49 тӱжем тонным шапашлыме да планым 95 процентлан темыме ыле.
Сенажым ямдылыме пашамат ворандарен колтымо. Тыге тиде кургым 57,2 тӱжем тонным, але палемдымын 66 процентшым, шапашлыме. Кодшо ийын тиде пагытлан 103 тӱжем тонным оптымо, планым 105 процентлан темыме улмаш. Тенийсе вӱдыжгӧ игечым ончыде, южо район, мутлан, Оршанке ден Шернур район-влак, сенажым палемдыме деч ятырлан шукырак ямдылен кертыныт. Шернур ден Звенигово район-влак силосым оптымо планым тӱрыс теменыт. А республик мучко тиде кургым 97,5 тӱжем тонным оптымо да планым 49 процентлан темыме. Кодшо ийын тиде пагытлан силосым 105 тӱжем тонным оптымо улмаш.
В.Смоленцев.
