27 мартыште Россий Федерацийын У коронавирус инфекций шарлыме ваштареш шогалме шотышто кугыжаныш советшын пашаче группыжын черетан заседанийже лийын. Тудым Сергей Собянин видеокыл йӧн дене эртарен. Заседанийыште Марий Элым вуйлатыше Александр Евстифеев участвоватлен.
Черетан заседанийыште у коронавирус инфекций шарлыме ваштареш шогалме мера, тыгак эн ончычак черланен кертме тӱшкаш пурышо еҥ-влакым рашемдыме, лабораторий диагностикым организоватлыме да эртарыме, РФ исполнительный кучемжын федеральный органже-влакын да субъектше-шамычын исполнительный кучемыштын органлаштын, тыгак верысе кучемлан Коронавирус ситуацийын мониторингше шотышто увер рӱдер дене вашкылышт нерген мутланеныт.
Регионыштына «Марий Элыште Гигиене да эпидемиологий рӱдер» ФБУЗ-ышто да «Республиканский СПИД да инфекциян чер дене кучедалме да профилактике рӱдер» ГБУ-што у коронавирус инфекцийлан умбакыже тергат. 27 мартлан нине лабораторийыште 1058 еҥ деч налме 1224 материалым шымлыме. Чыла анализ сай.
Марий Элым вуйлатышын организаций да аналитике виктемжын уверже негызеш М.ИВАНОВА ямдылен
