Туту.ру кудалыштме ден путешествийын аналитике сервис рӱдерже калыклан канаш кайыме годым могай чарак лийын кертме спискым ямдылен. Россий мучко турист семын але путешествийыште лийме годым мом палыман? Вакциным ыштыме нерген сертификатым могай регионышто йодын кертыт?
Адыгей. 19 июль гыч унагудылаш черланыме але вакцинаций (сертификат лийшаш) деч вара иммунитетан, але отрицательный ПЦР-тестан (14 ияш марте йоча-влаклан огеш кӱл) граждан-влакым гына илаш пуртат.
Архангельс область. Приморский муниципальный районысо Соловецкое ял шотан илемыш толшо-влакын пеленышт COVID-19 чер уке улмым пеҥгыдемдыше документ але вакцинаций нерген сертификат лийшаш.
Башкортостан. Ик ола гыч весыш але регион гыч регионыш коштшо автобусыш вакцинацийым эртымым пеҥгыдемдыше сертификатым ончыктет гын веле пуртат. Вакцинацийым эртыме огыл гын, тудым ышташ чарак улмым пеҥгыдемдыше справке але ПЦР-тест лийшаш (тудым налмеке, кум кече вийыште улмылан шотлалтеш).
Дагестан. Вакцинаций нерген справке, ПЦР-тест але антитела улмым пеҥгыдемдыше справке улмо годым веле Граждан-влакым унагудыш илаш пуртат.
Иркутск обласьт. ПЦР–тест, антитела улмым ала вакцинацийым пенгыдемдыше справке улмо годым веле регион мучко кошташ лиеш (18 ияш марте-шамычлан тиде огеш кӱл).
Камчатский край. 15 июль гыч тушко мийыше турист-влакын ПЦР-тест але вакцинаций нерген справкышт лийшаш.
Карелий. 15 июль гыч унагудыш илаш вакцинаций нерген справкан але ПЦР-тестан граждан-влакым гына пуртат.
Кострома область. Унагудыш вакцианций, ПЦР-тестым эртыме нерген але антитела улмым пеҥгыдемдыше справке почеш гына пуртат.
Краснодарский край. Унагудыш илаш пураш ПЦР-тест, антитела улмо нерген справке але вакцинацийым пенгыдемыше сертификат (тичмаш але ик компонентан) лийшаш (14 ий марте ПЦР-тест огеш кӱл). 1 август гыч курортыш вакцинироватлалтше, официально черланен тӧрланыше, тыгак ПЦР-тестан (унагудыш вакцинаций деч вара кум кече жапыште илаш пурен) гына пурталтыт.
Моско область. Общественный верлаш пурымо годым вакцинацийым пеҥгыдемдыше QR-кодан сертификатым але ПЦР-тестым (18 ияш марте огеш кӱл) ончыкташ йодыт. Кум кече деч утлараклан унагудыш илаш пураш вакцинаций нерген справке, ПЦР-тест але антитела улмым пеҥгыдемдыше справке дене гына лиеш.
Ямал-Ненец автономный округ. Верысе прописке деч посна регионыш пураш ПЦР-тестым але вакцинаций нерген сертификатым йодыт.
С.Носова ямдылен
