Марий Эл правительствыште сонар да кундемыштына чодыра поянлыкым аралыме йодышлан пӧлеклалтше совещаний эртен. Тудым республик вуйлатыше А.Евстифеев эртарен. Тушко Пӱртӱс поянлык, экологий да йырым-йырысе средам аралыме министерствын еҥже, сонарзе-влак чумыргеныт, увертара Марий Эл вуйлатышын организаций да аналитике виктемже.
Совещанийыште республик вуйлатыше Чебоксарысе вӱдаралтышым чоҥымо йодышым нӧлталын. Тудо вӱдын кӱкшытшым нӧлталме республиклан моткоч кугу эҥгекым конден кертмым палемден. Тидлан кӧра ятыр мланде вӱд йымаке кая, чодыра да тушто илыше чонанлан кугу зияным, регионын экономикыжлан эҥгекым ышта. Сонарлыме кумдык кок миллион гектарым айла гын, куралме да ӱдымӧ мланде шым тӱжем гектарыш гына шуэш. Сандене Марий Эл правительстве вӱд кӱкшытым нӧлталаш ок келше, палемден тудо.
А.Евстифеевын мутшо почеш, сонар озанлык дене кылдалтше пашам регионысо экономикыште кумданрак кучылтман, вет тудо кугу лектышым пуэн кертеш. Тыгак чодыра озанлыкын пашажым электрон йӧн полшымо дене тергымым палемден. Тиде йодышым тылзе ончыч Чебоксарыште Юл кундем федеральный округышто Россий Президентын полномочный представительже И.Комаровын эртарыме совещанийыштыже каҥашеныт.
Сонар поянлыкым аралыме да чодыраште илыше янлык ден кайык-влакын чотыштым кугемдыме дене кылдалтше йодышымат лончылымо. Тыге республикын правительствыже сонар поянлык дене пайдаланымылан разрешенийым пуымо да тудым шеледыме черет радам шотышто законыш вашталтышым пурташ темлен. Тидын нерген радамлын пӱртӱс поянлык, экологий да йырым-йырысе средам аралыме министр В.Шутов каласкален.
Таче кечын лицензийым налаш шонышо-шамычлан шуко жап черетыште шогаш перна. А ямдылыме закон проект разрешенийым пуымо пашам куштылемдаш полшышаш. Вашталтыш дене келшышын, кӱчан шолдыра янлыкым, маскам сонарлаш эн ончыч тугай еҥлан пуат, кӧ чодыра озанлыкым вияҥдымаште тырша: пире, рывыж чот ынже куш манын сонарла, янлыклан ешартыш кормам пукша, сонар поянлыкын теле маршрут учётшым ышта. Тыгай сонарзе-влаклан 50 процент лицензийым ойырат. Кӧлан пуышашым 6-8 еҥан комиссий палемда. Моло 50 процентшым жребий почеш ойырат.
Погынымаште лийше южо еҥже темлыме вашталтыш дене келшыдымыжым ончыктен. А.Евстифеев законым республик вуйлатыше, министр огыл, а Кугыжаныш Погын пеҥгыдемда манын палемден. Санденак тиде вашталтыш илышыш пурыжо да еҥ-влакын шонымашыштым шотыш налышт манын, сонарзе-шамычын сообществыштым ышташ темлен. Тушто кажне районын еҥже лийшаш.
Совещанийын кокымшо ужашыже «Шойбулакский» племзавод» АО ден «Звениговский» СПК-ан сӧсна комплексла воктенысе 20 километр кумдыкышто ир сӧснан чотшым шагалемдыме йодышлан пӧлеклалтын. Тиде жапыште тӱкан шолдыра вольыкым аралыме зонышто пукшаш чарыме нерген кутыреныт. Тиде африкан чума деч аралалташ полшышаш.
Вашлиймаш мучаште А.Евстифеев сонар ушемлам вуйлатыше-влаклан пашаштышт окса лектышым шукемдаш кӱлмым палемден. Тидлан экологий туризм кугу шӱкалтышым пуэн кертеш, каласен тудо.
Л.ШАБДАРОВА.
Д.Речкинын фотожо.
