ТАЗАЛЫК

Вашкеполышым – вертолёт дене

Республикысе клинический больницын реанимацийышкыже Шернур районысо рӱдӧ эмлымвер гыч черле ӱдырамашым санавиацийын вертолётшо дене экстренно кондымо. Тиде Марий Элысе пациент-шамычым Йошкар-Оласе медицине организацийлашке юж транспорт дене кондыштарыме латкандашымше случай.
Вашкеполышым, ты шотыштак специализироватлыме медицине вашкеполышым пуашлан авиаций пашам шуктымо шотышто контрактым «Руш вертолёт системе» АО дене сентябрьыште ыштыме. Контрактын акше – 15 млн. теҥге. Санавиацийын вертолётшо Чебоксарыште шинча, да тудын дене марий ден чуваш медик-влак пайдаланат.
Тымарте вертолёт пациент-влакым тӱҥ шотышто Курыкмарий да Волжский районла гыч кондыштарен. Нине черлылан Республикысе клинический больницын, Республикысе онкодиспансерын, Регионысо вӱргорно рӱдерын да Перинатальный рӱдерын специалистше-влакын полышышт кӱлын.
«Тазалык» национальный проектын «Первичный медико-санитарный полышым пуымо системым вияҥдымаш» регионысо проектшым илышыш пуртымо кышкарыште санавиацийын вертолётшо дене идалык мучаш марте 35 гана пайдаланаш палемдыме.
Марий Элын Тазалыкым аралыме министерствыжлан вертолёт шичме площадкым чоҥаш республикын бюджетше гыч 13 млн. теҥге кугыт капитальный вложений лимитым ойырымо. Чоҥымо пашан проект документацийжым ямдылыме, тудын шотышто кугыжаныш экспертизым эртараш контрактым ыштыме.

М.ИВАНОВА 

Опубликовать в Одноклассники

Добавить комментарий