КАЛАСЕ, "МАРИЙ ЭЛ"

Бахилым чийышаш але уке?

Ешыштына инвалид уло, сандене жапын-жапын вашкеполыш службын полышыжлан эҥерташ логалеш. Палынем ыле, тиде бригадын пашаеҥже-влак, черле деке пӧртыш але пачерыш пурымеке, йолчиемыштым кудашшаш але бахилым чийышаш огытыл мо?

В.Игнатьев

Кужэҥер район

 

Йодышлан Медицине полышым вашке пуымо станцийын ик фельдшерже (лӱмнержым каласыде кодаш йодын) вашештен:

–  Тиде йодыш шке жапыштыже калык коклаште кугу ӱчашымашым луктын ыле, да Россий Федерацийын Тазалыкым аралыме министерствыже тудлан 2016 ий 19 октябрьыште мучашым ыштыш – «нормативно-правовой базыште тыгай обязанностьым ончыктымо огыл».

Айдемылан мӧҥгыштыжӧ йӧсӧ лийын, а пеленже улшо-влак «вашкеполыш» машинам вашлийме, черлым тергаш да тудлан писынрак медицине полышым пуаш йӧным ыштыме олмеш пачер але пӧрт кӱварышт амыргыме шотышто тургыжланаш, вурседылаш тӱҥалыт мо?

Фельдшер сумкан комплектацийышкыже бахил огеш пуро, сандене медицине пашаеҥ тудым чийышаш огыл. А чияк гын, тугеже лӱдыкшыдымылык техникын правилжым пудырта: трук яклештын камвозеш да паша жапыште иктаж-можым сусырта. Черлылан, жапым шуйкалыде, полшаш але тудым эмлымверыш наҥгаяш кӱлеш гын, бахилым чиен-кудашмылан жап йомеш.

Пӧрт але пачер кӱварым амыртыме деч лӱдыда гын, медицине пашаеҥын толмыж марте омса воктелан йолым ӱшташ йӧршӧ вӱдыжгӧ лапчыкым пыштыза, паласым але ковёрым кораҥдыза, олмешыже газетым але эше иктаж-мом шарыза, врачым але фельдшерым тугай пӧлемыш пуртыза, кушто шартыш уке, да кӱварым почешыже швабре дене йыгалташ лиеш.    

М.ИВАНОВА

Опубликовать в Одноклассники

Добавить комментарий