Россий Федерацийын премьер-министрже Михаил Мишустин ЕГЭ-м кучымо шотышто пунчалыш кидпалым пыштен.
Тений 9-ше да 11-ше классым тунем пытарыше-влаклан аттестатым экзамен деч посна пуат. Ӱдыр-рвезе-влак ты документ дене кыдалаш профессионал тӧнежлаш пурен кертыт, вузлан ЭГЕ-м эртыман.
М.Мишустинын палемдымыж почеш 2020 ийыште Россий мучко 736 тӱжем выпускник кӱшыл шинчымашым налаш кумылан.
Икымше экзамен 29-30 июньышто тунемше-влак деч посна эрта. Ты годым технике могырым чыла терген ончынешт.
ЕГЭ-м кучымо жап – 3-23 июль марте. Тыгак тунемшын кок ойырен налме предметше ик кечылан логалеш гын, тунам иктыж дене шинчымашым 24-25 июльышто терген кертеш. Выпускник июльышто иктаж амаллан кӧра экзаменым кучен огеш керт гын, тидым августышто ышташ йӧн уло.
О. МОШКИНА