Ангиограф пашам ышташ тӱҥалын

Йошкар-Оласе больницыште у ангиограф пашам ышташ тӱҥалын.
«Здравоохранений» национальный проектын «Шӱм-вӱргорно чер дене кучедалмаш» регионысо проектшым илышыш пуртымо кышкарыште 2020 ийыште Йошкар-Оласе эмлымверым олмыктымо да кокымшо рентгеноперационныйлан верым ямдылыме. Тушко Azurion «Philips» у ангиографический системым шындыме, да тудо шукерте огыл пашам ышташ тӱҥалын. Оборудованийын суммыжо 54 млн. теҥгеш шуын.
Azurion «Philips» системе – пациентын капкылжым пӱчде, ангиографический шымлымаш ден интервенцийым эртараш йӧным ыштыше чапле оборудований.
Эмлымверыште улшо Artis zee floor universal, Siemens AG ангиографический установкым 2012 ийыште шындыме. Тыгерын, медицине тӧнежыште ынде кок ангиограф пашам ышта.
«Шӱм-вӱргорно чер дене кучедалмаш» регионысо проектым илышыш пуртымо дене Марий Эллан шӱмын ишемический черже дене кылдалтше кӱкшӧ технологиян операцийым утларак ышташ йӧн лектын: 2019 ийыште 733 тыгай манипуляцийым эртарыме гын, 2020 ийыште – 800, а 2024 ий марте тиде чотым 960 марте шукташ палемдыме.
Ангиограф полшымо дене медик-влак шӱмын ишемический черже дене кылдалтше операцийым ыштыме деч посна эше диагностический шымлымашым, вуйдорыкышто вӱр коштмо паша пужлымо, шодо вӱргорнышто тромбоэмболий, кид-йол вӱргорнышто пӱсӧ да хронический чер улмо годым операций шотан манипуляцийым эртарат.
«Здравоохранений» национальный проектын «Шӱм-вӱргорно чер дене кучедалмаш» регионысо проектшым илышыш пуртымо кышкарыште 2020 ийыште Йошкар-Оласе эмлымверлан чылаже 67 млн. теҥгелан оборудованийым налме, тиде – реабилитацийым эртыме Thera-trainer Balo Simple тренажёрым, шодым искусственно вентилироватлыме Chirolog SV аппаратым, механотерапийлан «Ортодент» аппаратым, Affiniti «Philips» ультрайӱкан системым.
Реабилитацийым эртыме тренажёр инсультым чытен лекше-влаклан палемдалтын. Тудо модмо гай тренировко дене пациентым шкенжым рыҥ кучаш кумылаҥда. Черлын вуйжо вучыдымын савырна гын, йӧрлмӧ деч тренажёрын системыже арала.
Шодым искусственно вентилироватлыме универсальный аппарат чыла пациентлан келшен толеш. Тудын дене пайдаланаш нимо нелыжат уке. Адакше аппаратлан темдыме юж огеш кӱл, пашамат йӱк деч посна ышта. Кызытсе жаплан келшыше ИВЛ-ын чыла тӱҥ режимже уло.
Механотерапийлан палемдалтше аппарат кийыше черле-влакым кече еда тренироватла. Инсульт, кид-йол травме деч вара, тыгак чогашыл системын пашаже пужлымо годым пациентлан йол ӱмбак шогалаш полша.
Инновационный ультрайӱкан Philips системе пеш кугу нагрузко дене пашам ыштен да неле пациентым шымлыме годым раш результатым жапым шуйкалыде пуэн кертеш. Тиде – пытартыш жапыште ыштен лукмо эргономичный, технологичный да пеш виян УЗИ-сканер.