ВКонтакте социальный кылысе «Коронавирус. Марий Эл Республикын оперативный штабше» группын палдарымыж гыч, таче, 15 апрельыште, у коронавирус инфекций дене авалталтме эше 27 у случайым регистрироватлыме. Тыге, республикыштына таче кече марте COVID-2019 дене чылаже 118 еҥ черланен, 8 еҥ паремын да икте колен.
Пытартыш суткаште рашемдыме чыла случай тымарте черланыше-влак дене кылым кучымо дене кылдалтын.
Республикысе Гигиене да эпидемиологий рӱдерын, СПИД-рӱдерын лабораторийлаштышт коронавируслан чылаже 9187 шымлымашым эртарыме.
М.ИВАНОВА
