Марий Эл правительствын совещанийыштыже республикысе журналист-влакын пашадарыштым кӱзыктымӧ нерген йодышым ончен лектыныт.
Марий Эл Республик вуйлатыше Александр Евстифеев палемден: ты отрасльыште пашадарым кугемдыме шотышто чынжымак нелылык уло, сандене ситуацийым вашталташ манын, чыла ыштыман.
— Медиатӱшка-влакын еҥыштын таче кузе илымышт да пашам ыштымышт нерген йодышым ме чылан пырля ончен лекшаш улына. Нунын моткоч кӱлешан пашам шуктымыштымат шотыш налман. Кеч кызыт сайлымаш монь уке, сандене ме иктаж-кӧлан келшаш шонен огыл ты йодышым нӧлталына. Жапын-жапын республикысе тӱрлӧ отрасльыште ыштыше-влакын пашадарышт ден социальный пакетышт велым илышыштым онченак лекман, — палемден регион вуйлатыше канашышашлык тӱҥ йодыш шотышто.
Ончыч «Марий Эл» ГТРК-ан пашаж нерген ВГТРК-ан филиалжым вуйлатыше Станислав Маринин палдарен. Тудын ойлымыж почеш, компаний кок йылме дене программе-влакым наҥгая. Тений национальный вещанийын кугытшымат телевиденийыште 23 шагатлан, радиошто 30 шагатлан кугемдыме.
Александр Евстифеев телевизионщик-влакын пашадарыштым кугемдыме шотышто йодышым ончен лекташ кӱштен. А тидлан компанийын бюджет деч ӧрдыжысӧ парышым утларак кучылташ темлен. Тыгак посна тематике дене вещанийым кугемдаш йодын. Мутланымаш годым компанийын материально-технический базыжым уэмден толмо, республик правительстве велым полыш лийме шотыштат йодышым нӧлталтме.
Регион вуйлатыше совещаний годым эше журналист-влакым стимулироватлыме, отрасльыш утларак кӱкшо квалификациян специалист-влакым ушнаш кумыландыме шотышто йодыш-влакым тарватен. Тидын шотыштак сай профессионал-влакым утларак палемдаш, гонорар фондым кугемден толаш темлен.
Совещанийыште региональный журналист-влакын пашадарышт могай кугытан лийме нергенат мутланеныт. Мутлан, правительстве председательын икымше алмаштышыже Михаил Васютин, тыгак тӱвыра, печать да калык-влакын пашашт шотышто министр Константин Иванов палемденыт: лишыл жапыште Марий Элын Финанс министерствышкыже республикысе СМИ отрасльыште ыштыше-шамычын пашадарыштым кугемдаш мыняр средстве кӱлмӧ шотышто темлымаш-влакым колтышаш улыт. Чыла темлымашым вес ийлан бюджетын строкаж дене пеҥгыдемдат гын, тунам районысо печатный изданийлаште ыштыше журналист-влакынат пашадарыштым кугемдаш йӧн лектеш. Тиде увер «Марий Эл» газетыште тыршыше журналист-влакынат пашадарыштым кугемдат манын ӱшаным пуа.
Вес гана тиде йодышымак регион вуйлатышын кӱштымыж почеш 1 ноябрьыште ончаш тӱҥалыт.
С.Носова.
