Таче республикыштына куд театр пашам ышта. Кажныжын – шке репертуарже, шке зрительже, шке акше. Актёр-влакын мастарлыкыштым ончаш кумыл эре уло гынат, манмыла, искусство храмыш толын кошташ чаракым ыштыше амал лектынак шога: я шоныдымын-вучыдымын уныкам ончаш кондат, я вольык черлана, я игече трукышто йӱкшемда, я лум чот опта, я мӧҥгешла пӧртылаш автобус расписаний келшен ок тол…
А теве Звенигово районысо Красногорский книгагудо пеленсе «Мушмарий сескем» клубын еҥже-шамычлан кодшо кечылаште пиал шыргыжалын – «Театр – чонын воштончышыжо» вашлиймаш-касыш Марий самырык театрын актёржо-влак Игорь Актуганов ден Александр Кожевников шкеак толыныт! Уна-влак актёр корныш шогалмышт, тиде пашан ойыртемже, кызыт могай спектакльлыште кӧн рольжым чоҥымышт нерген чон почын каласкаленыт. Игорь Актуганов ден Александр Кожевников калыкын театрыш утларак кошташ тӱҥалмыжым, тушто чоным кандараш, ала-мом уым муаш тыршымыжым, спектакльлам, артист-шамычын мастарлыкыштым тӱшкан каҥашаш погынымыжым палемденыт. Тидыжым клубын чолга еҥже Людмила Семёноват пеҥгыдемден, тудо М.Шкетан лӱмеш театрын «Югорно» спектакльже нерген шке шонымашыжым луктын ойлен, шочмо калыкын эпосшым чылалан ончаш темлен. А марий тӱвырам, йылмым, йӱлам арален кодымо йодышым Звенигово книгагудын краеведше Н.Боякова тарватен.
…Чон кеч урмыжын шортшо, кеч куанен юарлыже – репертуарыш пуртымо гын, актёрлан спектакльыште шке рольжым садак модман. Вашлиймаш-касыш толшо Игорь Актуганов ден Александр Кожевниковат, калыкын шӱм-чонжым тарватен, изирак сценкым модын ончыктеныт, шке жапыштыже кумдан палыме, но кызыт мондалтше мурым муреныт. Да тидын дене чылаштым куандареныт! Усталыкыштым аклен, кумылыштлан тауштен, «Мушмарий сескем» клубын еҥже-влак совым рӱж кыреныт. Тиде кечын нунылан Йошкар-Оласе театрыш миен толмыштлак чучын.
М.ИВАНОВА.
