Тений Ӱярня пайрем 11-17 мартыште палемдалтеш. Республикысе Марий тӱвыра рӱдер тудын дене кылдалтше марий калык йӱла пайремым Йошкар-Оласе рӱдӧ каныме паркыште 16 мартыште эртара. Тудо 11 шагатлан тӱҥалеш.
Школышто тунемше-шамычлан Йоча Ӱярня 21 мартыште Морко районысо Унчо кундемыште лиеш.
Кугыеҥ-влаклан эртаралтше пайремыш республикысе творческий коллектив-влак ушнен кертыт. Тидлан йодмашым ончылгоч mari-centr_konkurs@mail.ru адресыш колтыман. Кажныже 7 минут деч утла огыл шуйнышо театрализоватлыме представленийым ямдылышаш. Нунылан пырля кондымо пайрем чесым вераҥдаш ӱстел-влак лийыт. Мелнажымат ыштен кондыман, лӱмжӧ, рецептше ончылгоч возымо лийшаш улыт. Тыгак чесым презентоватлыме годым шке велысе калыкын койыш-шоктышыжлан, муро семжылан эҥертыман. Сеҥыше-влакым диплом да шарнымашан пӧлек дене палемдат.
Йоча Ӱярняш толшо кажне образовательный учреждений гыч куд еҥан команде лийшаш. Нуно икмыняр конкурсышто таҥасаш тӱҥалыт: «Пайремын символжо – «Ӱярня кува»; «Ӱярня мелна-2024», «Ӱярня» такмак батл. Участник-влаклан роскотым нуным колтышо организаций тӱлышаш.
С.Носова
М.Скобелевын фотожо
