Марий Эл вуйлатыше Юрий Зайцев Россий президент верч йӱклаш сайлымаш эртаралтме икымше кечынак, 15 мартыште, шке гражданский порысшым шуктыш.
Тудо 8 шагат эрденак Йошкар-Оласе 15-ше номеран участковый избирательный комиссийыш тольо да йӱклыш.
Тылеч вара тыге палемдыш:
– Таче, чынжымак, пайрем. Ончыкылыклан ӱшан пайрем. Мый чонем да шӱмем йодмо почеш йӱклышым. Кызыт кугу элнан пӱрымашыже рашемдалтеш. Тиде исторический событий деч ӧрдыжеш кодаш огеш лий. Сандене чылаштым ӱжам: толза да ончыкылыкна верч йӱклыза. Йӱклыза шӱмда йодмо почеш.
Л.Камалетдинова
Авторын фотожо
