25 январьыште Волжский районысо Карай ялыште Портышкем пайрем кудымшо гана эртыш.
Тенийысе телын койышыжым ончен ӧрат: кылмыкта, лум тӧшакым шара, левешта да чыла шулыктара, адакат кылмыкта да ялысе ма оласе мландым катокыш савыра, тымарте эн йӱштӧ тылзылан шотлалтше январь деч аптыраныде, йӱрым вела, корнысо лакылам вӱд дене тема… Эше ӱмаште Рошто, Крешене годым портышкем дене коштна гын, кызыт йолышко мом чияшат от пале: чапле коваште кемым ночкышто пытараш жал, резинке йолчием дене йӱштӧ да вӱдыжгӧ, калошан межгем деч изишак вожылмыла чучеш… Айдеме пӱртӱсыштӧ нимом вашталтен огеш керт, сандене игечын тыгай полдалге койышыжым шошо мартеат чыташ ямде ыле, очыни, да кодшо арнян вуйым уке-уке да ик йодыш тургыжландарен: «Йӱлаш пурышо Портышкем пайремжым ынде кузе эртарена?»
Ала калыкын тургыжланымыжым ужын, ала мландымбалне телын шукертак озаланышашыжым умылен, Юмо Портышкем пайрем вашеш игечым содыки тӧрлатыш: палынак йӱкшемдыш, чинче-вунчо лумжым шавалтыш да межгемым чияш йӧным ыштыш.
Тений Портышкем пайрем эше Россий студенчествын кечыжлан – Тачанан кечыжлан – тольо, сандене Карайыш мийыше пагалыме уна-влакат: Марий Эл Республикын Кугыжаныш погынжын депутатше-влак Лариса Яковлева ден Наталья Пушкина, «Волжский муниципальный район» муниципальный образованийым вуйлатыше Владимир Сергеев тӱвыра да каныме пӧртыш чумыргышо калыкым кок пайремже денат шокшын саламлышт, тений районышто ышташ палемдыме пашам радамлышт да, тудым пырля шуктен, сай лектышыш шуаш тыланышт.
Пайрем молгунамсе ийла семынак уремыштак вийым налын. Тыште тӱрлӧ кугытан да тӱсан портышкемым ужаленыт, шокшо вургемымат темленыт.
– Кызытеш кок мужыр межгемым ужалышым, эше налыт манын, пеш ӱшанем, – йӱштыштӧ чевергыше шӱргывылышан Лидия Кудрявцева портышкеман ик йолжым весышкыже пералтен мане. – Тенийысе теле шотанжак огыл гынат, калык портышкемым мӧҥгыштӧ чияш налеш, вет тиде – тазалыклан пайдале йолчием.
Мероприятийын тӱҥ ужашыже Карай тӱвыра да каныме пӧртыштӧ эртен, сандене пайремын шӱлышыжӧ зданийыш пурымаштак озаланен. Тыште, пеш поян ончер-ярмиҥгаште, школышто тунемше ӱдыр-рвезе-влак шке кидышт дене кӱэштме когыльым, кексым, оргажым, моло тутло кочкышым, эсогыл шӧр-торыкым ужаленыт. Нуным ончен, виян амалкалче-влак теве кушто да кузе тӱҥалтышым налыт, шоналтет. Такшым, Карай вел калык ожнысек торговой семын палыме, поснак – мочылам, щёткым да мойн Озаҥыш шумеш ужалаш коштмыж дене. Тиде вӱрышт таче мартеат йомын огыл, мӧҥгешла, вияҥын гына толын. Холлыштак амалкалче Д.Хайруллинын фермер озанлыкыштыже ямдылыме шӧр продуктшымат калык, манмыла, тавален налын, поснак – брынза гай свежа сыржым. Тыштак чайым, кофем темкаленыт, моло тутло сийым темленыт, портышкем да сӱрет выставкым аклаш йӧным ыштеныт.
Тӱвыра да каныме пӧртын волгыдо фойештыже пайремын эн шергакан ужашыже – «Мастар-влакын элышт» – верланен. Теве тыште Юлсер кундемысе калыкын кидпашажым кугезе пагыт гыч тачысе кече марте ужаш лийын. «Азъял кундем» художественный самодеятельность коллективын еҥже-влак межым шӱдырымӧ, шӱртым пӱтырымӧ, пижерге-носким пидме мастер-классым ончыктеныт, Эҥерӱмбал книгагудым вуйлатыше Людмила Иванова ден Ӱлыл Азъял книгагудым вуйлатыше Лидия Романова – портышкемым тӱрлен сӧрастарыме пашам, Карай школын 6-шо классыштыже тунемше-шамыч Ксения Григорьева, Роман Никифоров да Дарья Ватютова «Весела мастерской» кружокым вӱдышӧ Ирина Артемьева дене пырля – парня кутышан сувенир-портышкемым, Эҥерӱмбал ял гыч Виталий Быков ӱштым куымо мастарлыкше дене палдарен, Шарача кундем гыч Людмила Иванова малтыме меж дене келыштарыме тӱрлӧ сылне арверже дене ӧрыктарен, Ӱлыл Азъялын старостыжо Василий Очетов межгемым тумышташ туныктен… А пайремын чонжым – портышкемым йӧрымӧ пашам – Звенигово районысо Чуваш Отар ялыште илыше вате-марий Елена Георгиевна ден Сергей Николаевич Захаровмыт почын ончыктеныт. Кугезе пашам Еленалан аваже туныктен, ӱдырамаш – пелашыжым… Тыге, кок ий ончыч изи пӧртыштышт, шке манмыштла, «изи цехым» почыныт. Илен-толын, шочшыштымат портышкемым йӧраш туныкташ шонат.
Мурымаш, куштымаш, таҥасымаш да модмаш деч посна могай пайрем? Мероприятийын тӱҥ ужашыж деч вара калык залыш кусныш. Тыштыже Волжский районысо усталык коллектив-влак (Сотнур гыч тӱҥалын Пӧртанур марте) шке мастарлыкышт дене куандарышт. Тыгодымак уремыште портышкемым кышкен да мойн таҥасышт!
Тений Портышкем пайремым Волжский район администраций организоватлен да тӱҥ шотышто тӱвыра, капкыл культур да спорт пӧлкан пашаеҥже-влакын тыршымышт дене эртарен. Сандене конкурслаште сеҥыше-влакым тӱҥ шотышто нунак Чапкагаз, Таумут да пӧлек дене палемденыт, спонсор-влакат шке пӧлекышт дене куандареныт.
Маргарита ИВАНОВА
Авторын фотожо
