УВЕР ЙОГЫН

Эн у да ӱшанле

 Волжскышто неле ракете установкым наҥгайыше эн у тягачым пашаште тергеныт.

Роскосмосын еҥже-влакын каласымышт почеш, КамАЗ негызеш ыштыме у технике 90 гыч 165 тонн марте нелытан прицепым шупшаш келыштаралтын. Тыгодымак неле баллистический ракетым шупшыктен да шахтыш волтен кертше пелеприцепым тергеныт.

У техникым «Мотор» конструктор бюрон «Цэнки» ФГУП-шын специалистше-шамыч «Платформа-О» проект почеш ыштеныт да тӱнямбалне тымарте палыдыме ятыр у технологийым кучылтыныт. Ты техникым ыштен лукмаште йӧршеш у йӧным кучылтмо. Прицепын ораваже-влак гыч кажныже шке семынже кеч-кузела савырныл кертеш, технике шӧрын кудалын, аҥысыр верыште савырнен сеҥа, тидыже машинам утларак ӱшанлым ышта. Тыгодымак виктараш куштылго.  

«Платформа-О» программе дене келшышын, тыгаяк ятыр тӱрлӧ у машина ышталтшаш. Нуно войскаште стратегический ракете комплексым наҥгайыше тягач, неле военный техникым, мобильный тӱшкагудым, связь узелым, командный пункт ден штабым вер гыч верыш кусарыше технике семын кучылталт кертыт. Машина тергымашым сайын эртен, вашке тудым вооруженийыш налыт.

А.АНДРЕЕВ.

Опубликовать в Одноклассники

Добавить комментарий